Ruslan Abışov: Bolqarlarla oyunda daha aqressiv çıxış etməliyik

Futbol üzrə Azərbaycan yığmasının yarımmüdafiəçisi Ruslan Abışov Rusiyaya 0:4 hesablı məğlubiyyəti şərh edib. Azerisport.az xəbər verir ki, o, bunları söyləyib:

"Belə məğlubiyyəti gözləmirdik. Bu, ölkəmizin imici baxımından böyük zərbə oldu. Amma biz bu məğlubiyyəti unudub, qarşıdakı Bolqarıstanla oyuna köklənməliyik. "Bakcell Arena"da keçirdiyimiz oyunlarda heç vaxt uduzmamışıq. Ümidvaram ki, ən azı bu ənənəni davam etdirəcəyik".

Berti Foqtsun AÇ-2016-nın seçmə mərhələsindəki Bolqarıstanla oyun öncəsi bu rəqibdən nələrisə gizlətməyə çalışmasının mümkünlüyünə toxunan Abışov belə düşünmədiyi bildirib: "Düşünmürəm ki, biz hansısa kartlarımızı gizli saxlamağa çalışdıq. Bolqarlarla oyunda daha aqressiv çıxış edib, qələbə qazanmalıyıq. Mənə müdafiədə oynamaq daha asandı. Amma lazım gələndə yarımmüdafiədə də oynaya bilərəm".

Ruslan "Qarabağ"ın aparıcı braziliyalı futbolçularının milliləşdirilməsi məsələsindən də danışıb: "Reynaldo və Riçard Almeyda kimi futbolçuların yığmamıza dəvət olunması komandamızın gücünə güc qatardı. Düzdü, yığmamızda daha çox azərbaycanlı futbolçuların oynamasını istərdim. Amma belə legionerləri götürməyə dəyər".

Yığmamızın üzvü yenidən legioner həyatı yaşamaq istəyindən də bəhs edib: "İndi bütün fikirlərim "Qəbələ" ilə bağlıdı. Amma gələcəkdə yenidən legioner həyatı yaşamaq istərdim".