Berti Foqts: Bolqarıstanla matçda tam fərqli oynayacağıq

Futbol üzrə Azərbaycan yığmasının baş məşqçisi Berti Foqts Rusiya ilə yoxlama oyunundakı 0:4 hesablı məğlubiyyətdən danışıb. Azerisport.az xəbər verir ki, o, öncə bunları söyləyib:

- Məğlubiyyətin səbəbi müdafiədə buraxdığımız dörd səhv oldu. Çünki futbolçular həmin epizodlarda müdafiəni düzgün qurmamışdılar. Oyunçuların hamısı bu oyuna hazır deyildi. Bolqarıstanla oyunda isə dəyişikliklər olacaq. Rusiya ilə oyun, prinsipcə, elə mənim bildiklərimi göstərdi. Rəqib bizi sürətdə üstələdi. Buraxılan dörd qolda faciə görmürəm. Dünya çempionu Almaniya yığması da Argentinadan 4 qol buraxdı. Yoxlama oyunları nəticədən daha çox yoxlanış üçün vacibdi.

- Bədavi Hüseynovla Rəşad Sadıqov niyə müdafiənin mərkəzində birgə oynamır? Axı onlar "Qarabağ"da inamlı təsir bağışlayırlar....
- Rasim Ramaldanov bəzi oyunlarda özünü pis tərəfdən göstərmədi. Amma son zamanlar onda nəsə alınmır. Amma bizim müdafiə xəttindəki problemlər təkcə mərkəzlə bağlı deyil. Cinahlarda da problemlərimiz var.

- Rusiyaya məğlubiyyət futbolçulara psixoloji cəhətdən problem yaratmayacaq?
- Psixoloji baxımdan uşaqlarda problem olacağını düşünmürəm. Bolqarıstanla görüşdə biz daha yaxşı oyunun şahidi olacağıq. "Qarabağ"ın oyunçuları göstərdilər ki, onlar təkcə klublarını düşünmürlər.

- İsrailə qalib gələn U-21-in futbolçularından əsas yığmaya dəvət alan olacaq?
- Əsas komandada onsuz da kifayət qədər gənc futbolçumuz var.

- Maksim Medvedevi niyə çağırmamısız?
- O, cəzalı olduğu üçün bizə kömək edə bilmir. Buna görə Maksimə dəvət göndərməmişəm. "Qarabağ"ın braziliyalılarının xidmətindən isə yararlana bilmərəm.