Rəşad Sadıqov: Moskvada ən azı layiqli oyun gözləyirdim
Futbol üzrə Azərbaycan yığmasının kapitanı Rəşad Sadıqov Rusiyaya qarşı keçirilmiş yoxlama oyunundan sonra azerisport.az saytının suallarını cavablandırıb:
- Ayağınız sarğılıdı. Ciddi nəsə yoxdu?
- Xeyr, zədəm yoxdu. Profilaktiki tədbirdi.
- Oyun haqda nə deyə bilərsiz?
- Danışılası nəsə yoxdu. Özümüzə yaraşmayan şəkildə oynadıq. Birinci hissədə ümumiyyətlə, heç nə alınmadı. Həm topla, həm də topsuz istədiyimiz kimi hərəkət edə bilmədik.
- Belə zəif oyunun səbəbi nədi?
- Bilmirəm.
- Komanda elə ilk dəqiqələrdə iki qol buraxdı. Motivasiya yox idi, yoxsa psixoloji problemlər var?
- Standart vəziyyətdən iki qol buraxdıq. Mən belə məğlubiyyəti gözləmirdim. Düşünürdüm ki, burada ən azından layiqli oyun sərgiləyərik. Yalnız son 15-20 dəqiqədə top saxlamağa başladıq, daha yaxşı oynadıq.
- Elə də ucaboy olmayan Kerjakov iki ötürməni qol çevirməyi bacardı. Bəs daha ucaboy bolqarlarla oyunda necə olacaq?
- Rəqib məndən daha ucaboydusa, hansı səhvdən danışmaq olar ki? Bizim üçün "ikinci mərtəbə"də oynamaq həmişə problem olub. Həmişə bundan əziyyət çəkmişik. Elə "Qarabağ"ın Avroliqada "Zalsburq"a buraxdığı qolları götürək. Daha diqqətli olmaq lazımdı. Yaxşı oynayırsan, təsadüfən belə bir standart vəziyyətdən qol buraxırsan, hər şey əldən çıxır. Çünki komanda sınır. Ondan sonra toparlanmaq çətin olur.
- İlk qoldan sonra Bədavi Hüseynovla nəsə danışırdız...
- Sadəcə, epizodu ona başa salırdım.
- Bolqarıstanla oyun öncəsi bu məğlubiyyət komandamıza mənfi təsir göstərməyəcək?
- Psixoloji baxımdan əlbəttə, xoş deyil. Buradan yaxşı nəticə ilə qayıtsaydıq, şübhəsiz ki, futbolçuların özünəinamı daha yüksək olacaqdı. Amma istənilən halda başqa çıxış yolumuz yoxdu, toparlanmaq lazımdı.
