Vaqif Cavadov: Rusiyaya məğlubiyyəti faciəyə çevirmək lazım deyil

Futbol üzrə Azərbaycan yığmasının hücumçusu Vaqif Cavadov Rusiyaya qarşı keçirilmiş yoxlama oyunundan sonra azerisport.az saytının suallarını cavablandırıb.

- Azərbaycan yığması Rusiya ilə həmişə bərabər mübarizə aparmağa nail olub. Bu dəfə niyə alınmadı?
- İstəməzdik ki, nəticə belə olsun. Komandamızın hər bir üzvü sonadək meydanda döyüşdü. Amma buraxılan ilk qol bütün oyunumuza təsir göstərdi. Yoxlama oyunu olsa da, bizim üçün bu görüş vacib əhəmiyyət daşıyırdı. Çünki qarşıda bizi AÇ-nin seçmə mərhələsi gözləyir. Hər halda nəticə də çox pis oynamağımızdan xəbər verir.

- Kənardan da elə görünürdü...
- Mən elə düşünmürəm. Ən azı ikinci hissədə daha yaxşı oynamağa çalışdıq. İstənilən halda bu məğlubiyyəti faciəyə çevirmək lazım deyil. Əsas qarşıdakı Bolqarıstanla oyundu. Siz özünüz də hər şeyi başa düşməlisiz. Heyətdə çoxlu dəyişiklik vardı, eksperimentlər aparılırdı. Bolqarıstanla oyunda isə eksperiment olmayacaq, meydana çıxan hər kəs sonadək mübarizə aparacaq, motivasiya fərqli olacaq. Futbolda hərdən belə oyunlar, nəticələr də olur. Həyat davam edir. Yenə də deyirəm ki, bizim üçün əsas ayın 9-dakı oyundu.

- Bəs niyə yalnız ikinci hissədə mübarizə apardız?
- Buna artıq mən cavab verə bilmərəm. Belə alındı ki, ikinci hissədə daha yaxşı oynamağa başladıq. İlk yarıda isə bizdə heç nə alınmırdı.

- Bəlkə, start heyəti düzgün qurulmamışdı?
- Bunu mən müzakirə edə bilmərəm.

- Belə oyunla Bolqarıstana nəsə edə bilərik?
- Hələ hazırlaşmaq üçün vaxtımız var.

- Altı günə nə dəyişəcək ki?
- Siz həmişə deyirsiz ki, dəyişiklik yoxdu. Amma dəyişiklik olacaq.

- Bu nəticə komandaya psixoloji baxımdan mənfi təsir göstərməyəcək?
- Düzdü, uşaqlara psixoloji zərbə dəyə bilər. Amma biz mümkün qədər tez toparlanmalıyıq. Bolqarıstanla oyun Rusiya ilə görüşdən daha vacibdi.