Cavid Hüseynov: Əminəm ki, Bolqarıstana qalib gələcəyik

Futbol üzrə Azərbaycan yığmasının yarımmüdafiəçisi Cavid Hüseynov Rusiyaya qarşı keçirilmiş yoxlama oyunundan sonra azerisport.az saytının suallarını cavablandırıb.

- Millinin zəif oyunu haqda nə deyə bilərsiz?
- Əlbəttə, üzücü məğlubiyyətdi. Bu komandaya qarşı həmişə yaxşı oynayırdıq. Amma yəqin fikir verdizsə, bu oyunda əsas heyətin əksər üzvləri meydanda yox idi.

- Bu, yığmanın zəif oyununa haqq qazandıra bilər?
- Xeyr. İstənilən halda məğlubiyyət məğlubiyyətdi. Üzücüdü.

- Berti Foqts oyundan sonra nə dedi?
- Bildirdi ki, hər kəs öz oyunu haqda bir daha düşünsün. Təbii ki, sərgilədiyimiz oyun, nəticə onun da ürəyincə olmamışdı.

- Komandanın yorğun görünməsi nə ilə bağlı idi?
- Deməzdim ki, yorğun idik. Sadəcə, istədiyimiz kimi oynaya bilmədik. Start heyətimiz aparıcı futbolçulardan təşkil olunmamışdı. Baş məşqçinin öz düşüncələri var idi. Buna da hörmətlə yanaşmaq lazımdı. Mümkündü ki, Bolqarıstan yığmasının nümayəndələrindən bizim oyunumuzu izləyənlər var idi və iz azdırmaq istəyirdi.

- Bolqarlarla görüşdə belə oyunla nə gözləyə bilərik?
- İnanıram ki, Bolqarıstanla oyunda tamamilə fərqli oynayacağıq. Minimum Rusiya ilə oyunun ikinci hissəsindəki kimi çıxış etməyə və qələbə qazanmağa çalışacağıq. Hətta deyərdim ki, sentyabrın 9-da qələbə qazanacağımıza əminəm.