Foqts: Biz bu komanda ilə AÇ-nin final mərhələsinə çıxmağa çalışacağıq

Futbol üzrə Azərbaycan yığmasının baş məşqçisi Berti Foqts Rusiya ilə yoxlama oyunundan sonra fikirlərini açıqlayıb. Azerisport.az xəbər verir ki, almaniyalı mütəxəssis komandamızın 0:4 hesablı məğlubiyyətindən sonra bunları söyləyib:

- Rusiyanı qələbə münasibətilə təbrik edirəm. Rəqib bizdən güclü idi və nəticə də oyuna görə oldu. Bizi həm sürətdə, həm də taktikada üstələdilər. Futbolçularım çoxlu səhvlərə yol verdilər. Bu səhvləri görmək istəməzdim. Amma Bolqarıstanla vacib oyun öncəsi bunları görməyimiz xeyrimizə oldu.

- Eksperimentlərinizin fiaskoya uğradığını demək olar?
- Heyətdə eksperimentlər aparmaq üçün belə oyunlar lazımdı. Bizim müdafiə xəttində problemlər var idi. Bu, bizim ən yaxşı oyunumuz deyildi.

- Komanda psixoloji baxımdan hazırlıqlı görünmür...
- Problem heç də psixoloji hazırlıqda deyil. Sadəcə, Rusiya yığmasının futbolçuları hər şeyi taktiki cəhətdən düzgün etdilər, bizim oyunçular isə yox.

- Özbəkistan və Rusiya ilə oyunlar göstərdi ki, yığmamızın AÇ-2016-nın final mərhələsinə çıxmaq istəyi ciddi deyil. Siz hələ də əvvəlki fikrinizdə qalırsız?
- Biz bu komanda ilə final mərhələsinə çıxmaq üçün mübarizə aparacağıq. Evdə daha yaxşı oynayırıq. Mən komandama inanıram. Əsas odu ki, mövcud problemləri gördük və onları aradan qaldırmaq imkanımız olacaq.

- Son iki oyunda start heyətdə yer alan Dmitri Nazarovu əsas heyətin üzvü saymaq olar?
- Bu gün mən bir daha Bolqarıstanla oyunda kimlərə əsas heyətdə yer verəcəyimi gördüm. Nazarova gəlincə, hər şey onun özündən asılıdı.