Əfran İsmayılov: Foqts məni çağırmamaqla düz edib

Futbol üzrə Azərbaycan yığmasının və "Xəzər Lənkəran"ın yarımmüdafiəçisi Əfran İsmayılovun azerisport.az saytına müsahibəsi

- Azərbaycanla Rusiya arasındakı beşinci oyun nə ilə yadda qala bilər?
- Əvvəlki dörd oyun rəsmi turnirlər çərçivəsində baş tutmuşdu, bu isə adi yoxlama oyunudu. Amma bu oyuna da diqqətlə yanaşmaq lazımdı. Çünki qarşıdakı Bolqarıstanla seçmə mərhələ oyunu öncəsi son sınağımızdı.

- Yığmamıza bu oyunda nəticə nə dərəcədə vacibdi?
- Rusiya bizim üçün həmişə prinsipial rəqib olub. Onlar üzərində qazanılacaq qələbə və ya heç-heçə bolqarlarla görüş öncəsi futbolçularımız üçün böyük stimul olacaq.

- Berti Foqts deyib ki, futbolçularımız ruslarla oyuna 110%, qalan rəqiblərlə oyuna 60% motivasiya ilə çıxırlar. Bu, belədi?
- Bu, onun fikridi. Yəqin ki, əksər rəqiblərlə oyunda 60-cı dəqiqədən sonra tempin düşməsini nəzərdə tutur.

- Özbəkistanla oyuna çağırılsaz da, Moskvaya aparılmadınız. Niyə?
- Bilmirəm. Bu, Foqtsun qərarıdı, hörmətlə yanaşıram. Yəqin ki, yaxşı hazır olmadığıma görə çağırmayıb. Özü də mənə demişdi ki, daimi oyun təcrübəm olmasa, yığmaya çağırılmayacam. Bu, düzgün qərardı. Klubunda oynayan futbolçulara dəvət göndərilməlidi.

- Sizcə, yığmamız ruslarla oyunda gücünü qorumağa çalışacaq?
- Düşünmürəm. Bizə nəticə lazımdı. Amma fikrimcə, komandamız Bolqarıstanla oyuna tam fərqli istəklə çıxacaq.

- Razısız ki, Azərbaycanın indiki yığması daha güclüdü?
- Bunu deyə bilmərəm. Analiz aparmaq lazımdı. Əgər AÇ-2016-nın final mərhələsinə vəsiqə qazansaq, onda hansısa uğurdan danışmaq olar. Amma indidən nəticə çıxarmaq düz deyil.