Bartuloviç: Azərbaycan çempionuna hörmətlə yanaşmaq lazımdı
Ukraynanın "Dnepr" klubunun yarımmüdafiəçisi Mladen Bartuloviçin azerisport.az saytına müsahibəsi
- "Dnepr" çempionatdakı "Vorskla" ilə oyununda cari mövsümdə ilk dəfə xal itirdi. Niyə?
- Bu, bizim üçün vacib oyun olsa da, qələbə qazana bilmədik. Əksinə, uduza da bilərdik. İlk yarıda qol buraxsaq da, fasilədən sonra cavab qolunu vurub, xal qazandıq.
- "Dnepr" Avropa Liqasının qrup mərhələsinə hazırdı?
- Bəli. Ölkə çempionatının oyunları da göstərdi ki, biz yaxşı formadayıq. Avroliqanın təsnifat mərhələsində də pis oynamadıq. Amma qrup mərhələsindəki rəqiblərimiz kifayət qədər güclüdü.
- "Dnepr"in şanslarını necə qiymətləndirirsiz?
- Aydın məsələdi ki, qrup mərhələsində zəif komanda yer ala bilməz. Hesab edirəm ki, çox güclü qrupa düşmüşük. "İnter" və "Sent-Etyenn" kifayət qədər yüksək səviyyəli komandalardı.
- Bəs "Qarabağ"?
- Bu, mənim üçün yeni komandadı və etiraf edim ki, onlar barədə məlumatım yoxdu. Amma Azərbaycan çempionu olduğunu bilirəm. Deməli, ona hörmətlə yanaşmaq lazımdı. "Qarabağ"la oyunlarımız da çətin olacaq.
- Azərbaycan futbolu haqda nə dərəcədə məlumatlısız?
- Sizdə yaxşı futbolçuların olduğunu bilirəm. Yığmanız həmişə sürprizlərə imza atmağa çalışır. Sonuncu dəfə Rusiyadan xal almışdı. Dostlarımdan Tomislav Buşiçlə Uilyam Batista Azərbaycanda çıxış ediblər. İndiki komanda yoldaşım Sergey Kravçenko vaxtilə elə "Qarabağ"da oynayıb. "Qarabağ"ın "Zalsburq"a qalib gəlməsindən, azarkeşlərinizdən də xəbərim var. Amma bizim hədəfimiz qrupdan çıxmaqdı. Ona görə "Qarabağ"a qarşı ciddi oynamalıyıq.
- Azərbaycan və Xorvatiya yığmaları AÇ-2016-nın seçmə mərhələsində bir qrupda yer alsa da, deyəsən siz yığmaya dəvət olunmursuz...
- Baş məşqçi dəvət göndərmir. Halbuki, 27 yaşım var və yığmada çıxış edə bilərəm.
- Azərbaycanın Xorvatiya ilə oyunda sürprizə imza atmaq şansı var?
- Xorvatiya AÇ-nin final mərhələsinə çıxmağa çalışacaq. Bunun üçün yetərli gücə, heyətə malikdi. Xorvatiyanın "Barselona", "Real", "Atletiko" kimi klublarda çıxış edən futbolçuları var. Amma Azərbaycan da ciddi komandadı və bizə asan olacağını düşünmürəm. Əsas Bakıda məğlub olmamaqdı.
