Tahir Gözəl: Qarabağın güclənməsi Qurban Qurbanovdan asılıdı

"Qarabağ" klubunun vitse-prezidenti Tahir Gözəl azerisport.az saytının suallarına cavab verib.

- Çempionluq Kubokunu Ağdamda minlərlə azarkeş qarşıladı. Gələcəkdə komandanın ev oyunlarının Quzanlıda keçirilməsi mümkündümü?
- Ağdamda tariixi oyunlar oynamışıq. "Qarabağ"a dəstək olan hər kəsə təşəkkür edirəm. Ağdamdakı azarkeşlərimiz bizi tək qoymayıb. Rəqiblər üçün çətin anlar yaşanıb. Bütün klublarımıza Quzanlıda "Qarabağ"a qarşı oynamaq çətin olub. Mənim üçün əziz oyunların əksəriyyəti məhz burada baş tutub. Gələcəkdə əsas oyunlardan bir neçəsini Ağdamda oynamaq barədə düşünəcəyik. Bununla bağlı Peşakar Futbol Liqasına müraciət ünvanlanacaq. Sadəcə, stadionun ot örtüyü çox pis vəziyyətdədi. Biz lazımi strukturlarla danışırıq və stadionun ot örtüyünün düzəldilməsi üçün işlər görəcəyik. Bundan sonra oyunların Ağdamda keçirilməsi müzakirə olunacaq.

- Azərbaycan Premyer Liqasına uğursuz başladınız. "Qarabağ" startda xal itirməsini nə ilə izah edərdiz?
- Startda xal itirmək istəmirdik. Uğursuz başlanğıc oldu. Amma ümid edirəm ki, bundan sonrakı oyunlarda problem olmayacaq. Çempion komandamız bizi sevindirəcək.

- Avroliqanın qrup mərhələsində "İnter", "Dnepr", "Sent-Etyenn" klublarıyla mübarizə aparacaqsız. "Qarabağ"ın şanslarını necə qiymətləndirirsiz?
- "Qarabağ"ın uğurundan sonra çoxlu sayda təbrik almışam. "Tvente", "Real Sosyedad" kimi klublar Avroliqanın qrupuna vəsiqə qazana bilmədi. Amma biz bunu bacardıq. Sözsüz, qarşıda bizi çətin oyunlar gözləyir. Mən komandama inanıram və ümid edirəm ki, azarkeşlər əvvəlkitək bizi dəstəkləyəcək. Hər bir oyunda maksimum nəticə üçün oynayacayıq. Zədəli və cəzalımız olmasa, problem olmayacaq. Rəqiblərimiz zəif deyil, amma "Qarabağ" da artıq bu mərhələdə oynamağa layiqdi. "Qarabağ" layiqli oyunla qrup mərhələsinə vəsiqə qazandı.

- Yeni transferlər gözlənilirmi?
- Bizim klub peşəkar qaydalarla idarə olunur. Transferlərlə baş məşqçimiz Qurban Qurbanov məşğul olur. Əgər onun bəyəndiyi futbolçu olursa, rəhbərliyə bu barədə məlumat verilir. Nəticədə həmin futbolçuyla danışıqlara başlanılır. "Qarabağ" rəhbərliyi olaraq heyətə gücləndirməyə hazırıq. Transferlər baş məşqçimizdən asılıdı.

- "Bakı" ilə oyundan sonra Qurban Qurbanov söyləyib ki, iki futbolçunun transferi gözlənilir. Sizdə bu barədə məlumat var?
- Ağdama gələrkən yolda da transferlərlə bağlı danışdıq. Qurban Qurbanova söylədim ki, heyətlə bağlı kim lazım olsa, rəhbərliyə məlumat versin. Biz tez bir zamanda həmin futbolçuyla müqavilə imzalamağa çalışacağıq. Hazırda bizə heç bir ad deyilməyib. Amma unutmaq olmaz ki, vaxtımız da çox azdı. Qısa bir zamanda yaxşı futbolçu tapmaq da çox çətindi. Bununla belə məşqçimizə inanırıq.