Avropa Kubokuna yekun vuruldu
Avqustun 28-dən etibarən Jumeirah Bilgah Beach otelinin çimərlik futbolu meydançasında təşkil olunmuş Çimərlik Futbolu üzrə Avropa Kuboku – Bakı 2014 (Europen Beach Soccer Cup - Baku 2014) turnirinə ötən gün yekun vuruldu. Azerisport.az xəbər verir ki, 5-ci yer uğrunda oyunda Azərbaycan və Macarıstan milliləri qarşılaşıb.
Oyunun əsas vaxtı 3:3 hesabı ilə başa çatdığı üçün 3 dəqiqədən ibarət əlavə vaxt oynanılıb. Hesab dəyişmədiyi üçün qalib penalti seriyasında müəyyənləşib. Hər komanda üçün 3 zərbədən ibarət seriyada macarıstanlı futbolçular daha sərrast olub. Millimizin rəqibi penaltilərdə 2:1, ümumi nəticədə isə 5:4 hesabı ilə qalib gələrək turniri 5-ci yerdə başa vurub.
3-cü yer uğrunda qarşılaşma Yunanıstan və Rusiya milliləri arasında keçirilib. Rəqibini 7:4 hesabı ilə məğlub edən rusiyalı futbolçular turniri ilk üçlüyün sonuncu pilləsində qapayıb.
İspaniya və İsveçrə millilərinin qarşılaşdığı final oyununda pireneylilər 8:6 hesabı ilə qələbə qazanaraq Çimərlik Futbolu üzrə Avropa Kuboku – Bakı 2014 (Europen Beach Soccer Cup - Baku 2014) turnirində birinci yeri tutublar.
Final oyunu başa çatdıqdan sonra mükafatlandırma mərasimi keçirilib. Azərbaycan Çimərlik Futbolu Federasiyasının vitse-prezidenti Fərid Axundov turnirin ən yaxşı qapıçısı üçün təsis olunmuş mükafatı Macarıstan yığmasının qolkiperi David Fiskora təqdim edib.
Turnirin ən məhsuldar oyunuçusu, İsveçrə komandasının üzvü Noel Ott mükafatını AÇFF-nin prezidenti Fərid Novruzidən alıb.
İspaniya millisinin futbolçusu Juanma turnirin ən yaxşı oyuçusu adına layiq görülüb. Ona mükafatı FIFA Çimərlik Komitəsinin üzvü, Beynəlxalq Çimərlik Futbolu Təşkilatının vitse-prezidenti Joan Custo verib.
Çimərlik Futbolu üzrə Avropa Kuboku – Bakı 2014 turnirinin qalibi olan İspaniya milli komandasına kubok AFFA-nın baş katibi Elxan Məmmədov tərəfindən təqdim olunub.
Turnirdə keçirilmiş bütün oyunların hesabını bir daha diqqətinizə çatdırırıq:
28 avqust
İsveçrə – Yunanıstan 6:1
İspaniya – Macarıstan 6:4
29 avqust
Rusiya – Macarıstan 4:3
Azərbaycan – Yunanıstan 3:4
30 avqust
Rusiya – İspaniya 3:4
Azərbaycan – İsveçrə 8:9
31 avqust
Azərbaycan – Macarıstan 3:3 (1:2 – pen.)
Yunanıstan – Rusiya 4:7
İsveçrə – İspaniya 6:8
