İbrahim Şehiç: Qrup mərhələsində də sona qədər mübarizə aparacağıq
"Qarabağ"ın qolkiperi İbrahim Şehiçin azerisport.az saytına müsahibəsi
- "Tvente" səddini keçəcəyinizə inam nə qədər idi?
- Doğma meydanda 0:0 hesabından sonra şansların bərabər olduğunu bilirdik. Sadəcə, səfərdə daha çətin mübarizədən qalib ayrılmaq lazım idi. Oyun gərgin alındı. "Tvente" hucumçuları daim təhlükəli zərbələrlə yadda qalırdı. Düzdü, biz də onlara cavab verirdik. Reynaldonun gözəl şansı var idi. Ardınca Muarem hesabı bərabərləşdirəndən sonra ümidimiz artdı. Amma bilirdik ki, hər şey 90 dəqiqənin sonunda məlum olacaq.
- Hollandiyada son dəqiqələrdə müdafiədə oynadız. Yəqin, hesabı qorumaq əsas məqsəd idi...
- Deməzdim müdafiədə oynadıq. Sadəcə, rəqib hücum edərkən biz müdafiə olunmalı idik. Futbolda hər zaman belə olur.
- "Qarabağ" 4-cü cəhddən qrup mərhələsinə vəsiqə qazandı. Bu komandanın üzvü kimi hansı hissləri yaşayırsız?
- Sözsüz çox sevinirəm. Dostlar, tanışlar hamısı təbrik edir. Azarkeşləri sevindirdiyimiz üçün şadıq. Ardıcıl bir neçə il komanda qrup mərhələsinə vəsiqə uğrunda yarışırdı. Bu il istəyimizə çatdıq. İndi Azərbaycan çempionatı barədə, sonra isə yeni rəqiblərimiz barədə düşünmək imkanımız olacaq.
- Qrup mərhələsində "Qarabağ"dan nə gözləyək?
- Artıq əsas məqsədimizə çatdıq. Bundan sonra qrupda bizi daha çətin oyunların gözlədiyini bilirik. Sadəcə, biz hər oyuna diqqətlə hazırlaşıb əsl mübarizə göstərmək istəyirik. Qrup mərhələsinə çıxmaqla iş bitmir. Qrupdakı oyunlarda da Azərbaycanın şərəfini layiqincə qorumaq lazımdı. Bizim artıq itiriləsi heç nəyimiz yoxdu. Hər bir oyunda da çalışıb xal toplamaq gərəkdi.
- "Qarabağ"ın bu uğurundan sonra hər il sizdən yüksək nəticələr tələb olunacaq...
- Biz bunu anlayırıq. Qrup mərhələsinə düşməklə məsuliyyətimiz artdı. Bu uğur bütövlükdə Azərbaycan futbolunun və azarkeşlərinin uğurudu.
- Avrokuboklarda uğurlu çıxış edən klublar adətən çempionatda mükafatçılar sırasına düşməkdə çətinlik çəkir. "Qarabağ" üçün bir neçə cəbhədə mübarizə aparmaq çətin olmayacaq?
- Hər iki cəbhədə mübarizə aparmaq təcrübəmizi artıracaq. Ona görə problem olmamalıdı. Hazırda Avropa Liqasının qrup mərhələsinin başlanmasına 2 həftə var. Bu müddətdə bütün diqqətimiz çempionata yönələcək. Çalışıb bütün görüşlərdə yaxşı nəticə qazanmaq lazımdı. Sonra isə ilk görüşümüz barədə təhlil apararıq.
