Marko Nikoliç: Bizim heç bir maliyyə problemimiz yoxdu
Serbiyanın "Partizan" klubunun baş məşqçisi Marko Nikoliç Avropa Liqasının pley-off mərhələsi çərçivəsində "Neftçi"yə qarşı keçirəcəkləri cavab oyunu öncəsi fikirlərini açıqlayıb. Azerisport.az xəbər verir ki, o, bu gün baş tutan mətbuat konfransında öncə bunları söyləyib:
- Bakıda hava çox istidi. Bu da bizə təsir edir. Amma yerli hava şəraitinə uyğunlaşmaq üçün hələ vaxtımız var. Hər iki komanda bu mərhələni uğurla adlamaq istəyir və bir-birini yaxşı tanıyır. Yəqin ki, stadiondakı atmosfer komandama təsir edəcək. Amma mən futbolçularıma inanıram. Ümid edirəm ki, yaxşı oyun olacaq. Bizə superkonsentrasiya lazımdı. Ümid edirəm ki, matça səhvsiz başlayacağıq. Həyəcansız oynamağ açalışacağıq ki, yenə qələbə qazanaq.
- Sizi qazonun vəziyyəti daha çox təəccübləndirdi, ya şəhər?
- Şəhəri gəzmək üçün çox vaxtımız olmadı. Amma gördüklərimiz çox gözəl idi.
- Bəs qazon?
- Qazonu hələ görməmişəm. Məşqdən sonra nəsə deyə bilərəm.
- Serbiya mətbuatı hər gün sizin maliyyə problemlərinizdən yazır, amma "Partizan" hər oyunda qalib gəlir, Bakıda çarter reysi ilə səfər etmisiz. Bu, "Neftçi"ni arxayınlaşdırmaq üçün taktikadı?
- Bizim heç bir maliyyə problemimiz yoxdu. Bundan "Neftçi" ilə oyun öncəsi taktika kimi də yararlanmırıq.
- Serbiya çempionatında az qol buraxan "Partizan"ın "Neftçi"dən bir oyunda iki qol buraxması rəqibin gücündən xəbər verir?
- Futbolda belə şeylər olur. Bu, nə rəqibin gücündən, nə də bizim problemlərdən xəbər verir. Mən komandama inanıram. Əsas vəzifəmiz uduzmamaqdı.
- Son illər "Neftçi"nin avrokuboklardakı ev oyunları uğurlu alınmır. Bu, sizə əlavə stimul verir?
- "Neftçi" güclü komandadı. Vobayla Flavinyo kimi güclü futbolçuları var. Amma mən öz futbolçularıma inanıram. Belqraddakı kimi oynasaq, hər şey yaxşı olacaq. 2-ci qolu buraxdıqdan sonra da qələbə qazanacağımıza inanırdım.
- İki il öncə "Partizan" futbolçularının Saşa Stamenkoviçlə problemi olmuşdu...
- Biz onu Belqradda yaxşı qarşıladıq. Ümid edirəm ki, o da bizi Bakıda yaxşı qarşılayacaq.
