Azərbaycanlı futbolçu klubu məhkəməyə verir

Azərbaycanlı yarımmüdafiəçi Eddi İsrafilov İspaniyanın "Real Mursiya" klubunu məhkəməyə verməyə hazırlaşır. Azerisport.az xəbər verir ki, buna səbəb klub rəhbərliyinin onun transfer vərəqəsini vermək istəməməsidi.

Sözügedən komanda Sequnda B Liqasına göndərildiyi üçün, futbolçular artıq klubda qalmaq istəmirlər və özlərinə yeni iş yeri axtarmağa başlayıblar. Eddi də Sequnda Liqada çıxış edən klubların onun xidmətinə maraqlı olmasından yararlanaraq, iş yerini dəyişmək istəyir. Amma rəhbərlik bəzi futbolçularla yanaşı, İsrafilovu da məcbur heyətdə saxlamağa çalışır. Bu üzdən tərəflər arasında narazılıq yaranıb və güman ki, mübahisəli məsələyə məhkəmədə aydınlıq gələcək. Klubun üzləşdiyi maliyyə problemləri səbəbindən futbolçulara borcunun da olduğunu nəzərə alsaq, Eddi və komanda yoldaşlarının iddiasının qəbul olunması ehtimalı yüksəkdi.

İspaniya mətbuatının yazdığına görə, İsrafilovu heyətində görmək istəyən klublar sırasında La Liqa təmsilçisi "Qranada" da qoşulub. Eddi azad agent statusu alsa, mümkündü ki, elə bu komandaya keçsin.