Vanderson Skarduelli: Azərbaycan dilini öyrənmək məndə alınmadı

"Xəzər Lənkəran"ın müdafiəçisi Vanderson Skarduelli Azərbaycandakı yaşayışı, eləcə də gələcək karyerası ilə bağlı planlarından danışıb. Azerisport.az xəbər verir ki, o, öncə bunları söyləyib:

"Mədəniyyətlər arasındakı fərq böyükdü. Amma mənim üçün burada hər şey normaldı. Çünki buranın həyat tərzinə alışmışam. Azərbaycan böyük mədəniyyətə malik ölkədi. Demək olar ki, bütün dünyaya açılmaq imkanın var".

Skarduelli bəyan edib ki, o, burada ürəyi istəyən yeməkləri rahatlıqla tapa bilmir: "Xoşladığım yeməkləri burada təsadüfi halda tapa bilirəm. Ona görə də Braziliyadan qayıdanda həmişə özümlə bir çemodan ərzaq, yemək gətirirəm".

Braziliyalı futbolçu bəyan edib ki, o, Azərbaycan dilini öyrənməyi bacarmayıb: "Burada bəzi insanlar rus dilində danışırlar. Ölkədən kənarda yaşadığım müddət ərzində italyan, ispan, ingilis dilini öyrənmişəm. Amma Azərbaycan dilini öyrənmək məndə alınmadı. Burada kiminləsə söhbət edərkən ingilis dilindən və hərəkətlərdən istifadə edirəm. Klubumuzun isə portuqal dilini bilən tərcüməçisi var".

Skarduelli gələcək karyerasından da danışıb: "Hazırda ancaq "Xəzər Lənkəran"ı düşünürəm və karyeramı burada davam etdirmək fikrindəyəm. Ondan sonra isə İtaliya və ya Yunanıstana gedə bilərəm. Ola bilər ki, 33 yaşımda Braziliyaya qayıdım".