Azərbaycanlı Yuventusda ikinci oldu

11 yaşlı azərbaycanlı qapıçı Eldar Tağızadə İtaliyanın "Yuventus" klubunun bazasında növbəti təlim-məşq toplanışında iştirak edib. Azerisport.az xəbər verir ki, Tağızadə artıq üçüncü ildi ki, Turin klubunun düşərgəsində təlim-məşq toplanışında iştirak edir. Görünür, "Yuve"nin məşqçiləri ondan razı qaldığı üçün hər il bu toplanışlara azərbaycanlı qapıçını da dəvət edirlər.

Bu dəfə toplanış Turin yaxınlığındakı Vinovo şəhərciyində baş tutub. Hansı ki, klubun əsas bazası burada yerləşir və əsas komanda da burada hazırlaşır. Toplanışa 9-10 ölkədən 8-14 yaş aralığında təxminən 100 uşaq cəlb olunub. Onlardan 16-sı qapıçı olub ki, toplanışın sonunda Tağızadə ikinci seçilib. İlk yeri isə 14 yaşlı italiyalı qapıçı tutub.

Məşqçilər Tağızadəyə izah ediblər ki, onun gələcəkdə "Yuventus"un kollecinə düşmək şansı var. Lakin bunun üçün Eldarın daha çox məşq etməsinə, çalışmasına ehtiyac var. Kollecə futbolçular 14 yaşdan etibarən çağırırlar. Tağızadənin valideynləri də uşaqlarının dünyanın ən məşhur klublarından birinin kollecində təhsil almasının əleyhinə deyillər.

Qeyd edək ki, Eldar hazırda "Neftçi"nin qapıçısıdı. O, bu komanda ilə 11 yaşlılar arasında keçirilmiş çempionatda çempion olub, cəmi 1 qol buraxıb.