Ruslan Abışov: Qəbələ indi baxımlı futbol yox, nəticəyə oynayır
Futbol üzrə Azərbaycan yığmasının və "Qəbələ"nin müdafiəçisi Ruslan Abışov Topaz Premyer Liqasının 2-ci turu çərçivəsində "Bakı"ya qarşı keçirdikləri oyundan (2:0) sonra azerisport.az saytının suallarını cavablandırıb:
- Oyun haqda nə deyə bilərsiz?
- Bilirdik ki, çətin olacaq. "Bakı" asan rəqib deyil. "Neftçi" ilə oyunlarına baxmışdıq, analiz etmişdik. Düzünü deyim ki, bu komanda həmin oyunda daha yaxşı təsir bağışlamışdı. Bu oyunda isti, qazonun ideal vəziyyətdə olmaması da sözünü dedi. Birinci hissədə yaxşı təsir bağışlamasaq da, fasilədən sonra özümüzə gələ bildik.
- Birinci hissədə həyəcan var idi?
- İlk hissədə "Bakı" əks hücumlarda bizi tutmaq istədi. Oyunu əsasən, müdafiədən qururdu. Bu da bizim üçün çətinlik yaradırdı. Ancaq ikinci hissənin ortalarında rəqibdə yorğunluq öz sözünü dedi. Biz də imkandan yararlandıq.
- İlk qoldan sonra nə baş verdi?
- Qolu vurandan sonra rəqib dağılmağa başladı. Bu da bizim üstünlüyümüz idi. Daha inamlı oynamağa başladıq.
- Xətlər arasında anlaşma səviyyəsi hələ ideal deyil...
- Komandamız tam oturuşmayıb. Amma zamanla hər şey düzələcək. "Qəbələ" sıfırdan yığılıb. İnanıram ki, hər şey yaxşı olacaq. Əsas odu ki, nəticə qazanırıq.
- Tam oturuşmaq üçün yarım il lazımdı...
- Biz indi nəticəyə oynayırıq. Müasir futbol üçün bu, normaldı. Baxımlıq oyun sərgiləmədən də xal qazanmaq mümkündü.
- Reynaldonun milliləşdirilməsi məsələsinə münasibətiniz necədi?
- Əlbəttə, çox istəyərdim ki, Reynaldo millimizdə oynasın. Onun bizə köməyi dəyər. Hiss olunur ki, braziliyalı çox səviyyəli futbolçudu.
- Rusiya və Bolqarıstanla oyunlardan nə gözləyirsiz?
- Rusiyaya qarşı tam heyətlə oynasaq, nəticə qazanarıq. Legionerlərin milliyə çağırılması rəhbərliyin qərarıdı. Biz də istəyərik ki, yığmada yaxşı futbolçular olsun. Ümid edirəm ki, növbəti təlim-məşq toplanışında heyətimiz daha yaxşı olacaq. Azarkeşlər bizdən yaxşı nəticə gözləyirlər. Əminəm ki, oyuna yaxşı köklənə bilsək, hər ikisində nəticə qazana biləcəyik.
