Qarabağın rəqibi yenə də xal itirdi
Azərbaycan çempionu "Qarabağ"ın Avropa Liqasının pley-off mərhələsindəki rəqibi olan Hollandiyanın "Tvente” klubu ölkə çempionatında növbəti oyununu keçirib. Azerisport.az xəbər verir ki, sözügedən komanda 3-cü tur çərçivəsində səfərdə "NAK Breda” ilə qarşılaşıb.
Qarşılaşmada 2 qol vurulsa da, qalib müəyyənləşməyib. Hesabı 17-ci dəqiqədə Luk Kastaynosun qolu ilə qonaqlar açıblar. 28 və 55-ci dəqiqələrdə sarı vərəqə alan Andreas Byelland "Tvente"ni azlıqda qoyub. Meydan sahibləri say üstünlüyündən 90-cı dəqiqədə yararlana biliblər. Penalti qazanan "Nak Breda" bundan maksimum yararlanaraq, "Tvente"nin ardıcıl üçüncü oyununda da 1 xalla kifayətlənməsinə səbəb olub.
Bu nəticədən sonra "Qarabağ"ın rəqibi 3 xalla 13-cü yerdədi.
Qeyd edək ki, "Qarabağ"la "Tvente" arasındakı ilk oyun avqustun 21-də Bakıda keçirilib və 0:0 hesabıyla başa çatıb. Cavab görüşü isə ayın 28-də Enshededə baş tutacaq.
