Mircəlal Qasımov: Bu gün meydanda ikinci Nazim Süleymanovu görə bilmədim

Futbol üzrə Özbəkistan yığmasının baş məşqçisi Mircəlal Qasımov bu gün Bakıda Azərbaycan millisinə qarşı keçirdikləri yoxlama oyununu şərh edib. Azerisport.az xəbər verir ki, o, 0:0 hesabıyla başa çatan qarşılaşmadan sonra bunları söyləyib:

- Bu, bizim üçün lazımlı oyun idi. Bu gün çox yüksək hərarət var idi və belə havada futbolçulara qaçmaq çətin idi. Qol vəziyyətlərimiz oldu. Amma onları məntiqi sonluqla başa çatdırmağa tələsdik.

- Oyun öncəsi Azərbaycan futbolçularının texnikalı olmasından danışmışdız. Yenə fikrinizdə qalırsız?
- Bəli. Rəqibin heyətində texnikalı və ağıllı futbolçular var, qol vəziyyətləri yarada bilirlər. Aydın məsələdi ki, hər şey alınmır. Amma bu, yoxlama oyunudu. Biz bu gün sanki öz evimizdəymiş kimi oynadıq. Oyuna gələn azarkeşlərimizə təşəkkürümü bildirirəm.

- Azərbaycan yığmasının heyətində çoxlu legioner var idi. Niyə sizin heyətdə eləsi yoxdu?
- Bu gün legionerlərsiz oynadıq. Çünki onların öz komandalarının oyunları vardı. Bütün oyunçularımıza dəvət göndərmək imkanımız olmadı.

- Özbəkistan bu gün ikinci heyəti ilə oynadı?
- Hazırda bizim heyətdə gəncləşdirmə siyasəti aparılır. Yeni futbolçular gəlir. Bəzi futbolçularımız növbəti tsiklə kimi yaşlanacaq. Ona görə də komandada yeni nəfəsə ehtiyac var. Bu futbolçuların gələcəkdə də yığmada oynamasını istərdim. Biz bu günlə yaşaya bilmərik.

- Bu gün Azərbaycan yığmasının demək olar ki, bütün aparıcı hücumçuları meydanda oldu. Onlardan hansısa vaxtilə birlikdə oynadığınız Nazim Süleymanovu 30 faiz də olsa, xatırlada bildi?
- Bu gün meydanda ikinci Nazim yox idi. Şadam ki, elə bir futbolçu ilə birgə oynamışam. İndi də texnikalı uşaqlar var.