Şreyder: Qarabağ indi daha güclü olub, büdcəsi artıb
Hollandiyanın "Tvente" klubunun baş məşqçisi Alfred Şreyder Avropa Liqasının pley-off mərhələsi çərçivəsində "Qarabağ"a qarşı keçirdikləri ilk oyundan sonra fikirlərini açıqlayıb. Azerisport.az xəbər verir ki, o, qolsuz başa çatan qarşılaşmanı belə şərh edib:
- Oyunun belə maraqlı alınacağını bilirdik. Bu gün bizi hər şey qane etdi. Rəqibin qol vəziyyətləri oldu. Amma biz yaxşı müdafiə olunduq. "Qarabağ"ın "Zalsburq"la oyununa baxmışdıq və bilirdik ki, çox çətin olacaq. Bugünkü oyunumuzu də məhz həmin qarşılaşmaya əsasən qurmuşduq.
- Nəticə sizi qane edir?
- Səfər oyunu üçün bu, yaxşı nəticədi. Amma etiraf edim ki, 0:0 çox təhlükəli nəticədi. Başa düşürük ki, cavab oyununda bizi çətinliklər gözləyir. Biz bu gün risk etmədik.
- Cavab oyununda da belə oynayacaqsız?
- Kimə maraqlıdısa, gəlib baxa bilər. Sizə indidən heç nə deyə bilmərəm.
- Yetirmələriniz çox kobud oynayırdı. Bu, öncədən müəyyənləşdirilmiş taktika idi?
- Belə bir tapşırıq yox idi. Biz rəqibin təklif etdiyi oyuna uyğun mübarizə aparırdıq. "Qarabağ"ın da futbolçuları kobud oynayırdılar.
- Qazonun vəziyyəti sizin lehinizə idi?
- Qazonun durumu rəqibin oyununa mane olurdu. Onlar top saxlamaqda çətinlik çəkirdilər. Amma bizə də asan deyildi. Sadəcə, buna hazır idik.
- Beş il öncə ilə müqayisədə "Qarabağ"da dəyişiklik hiss etdiz?
- Fərq var. Klubun büdcəsi artıb, yeni oyunçular alınıb. Komandanın yaxşı müdafiə xətti var. Onlara qarşı oynamaq çətindi. İndi "Qarabağ" daha təcrübəli və güclüdü.
- O vaxt "Tvente" "Qarabağ"dan Vaqif Cavadovu almışdı. İndi də belə bir planınız var?
- Belə bir planımız yoxdu.
