Vaqif Cavadov: Hər oyuna Azərbaycan bayrağı ilə çıxacam
Futbol üzrə Azərbaycan milli komandasının və Türkiyənin “Qaziantep BB” klubunun hücumçusu Vaqif Cavadov Peşəkar Futbol Liqasının rəsmi saytına müsahibə verib. Azerisport.az xəbər verir ki, millimizin üzvü söhbət əsnasında bir sıra maraqlı məqamlara toxunub:
- “İnter”dən ayrıldıqdan sonra Türkiyənin “Qaziantep BB” klubu ilə anlaşdız. Türkiyə klubunda sizi necə qarşıladılar, klubun sizə ümidləri nədən ibarətdi?
- Türkiyədə məni çox yaxşı qarşıladılar. Müqavilə mərasimində klubun prezidenti və digər yüksək vəzifəli şəxsləri iştirak etdilər. Mənə ümidlər böyükdü. Bu məsuliyyəti dərk edərək deyirəm ki, Türkiyəyə turist kimi getməmişəm. İndi hər şey özümdən asılıdı. Məşqlərdə özümü yaxşı tərəfdən göstərib, mütəmadi olaraq, əsas heyətdə oynamalıyam. Öz oyunumda inkişafa nail olmaqla yanaşı, ölkəmizi də layiqincə təmsil etməliyəm.
- Baş məşqçi Nurullah Sağlam sizin barənizdə danışarkən deyib ki, “Vaqif Cavadov hədəfi mütləq çempionluq olan komandaya transfer edildiyini anlamalıdı”. Bu, sizdə hansı hissi formalaşdırıb?
- Nurullah Sağlamın belə deməsini normal qarşılayıram. Çünki Sağlam həmişə məqsədləri olan komandaya rəhbərlik edib. Elə mən də həmişə çempionluq uğrunda yarışan kollektivdə çıxış etmişəm. “Qaziantep BB” klubunu seçməyimdə Nurullah Sağlam amilinin rolu böyükdü.
- Sizinlə yanaşı U-21 millimizin üzvü Rəhman Hacıyev də “Qaziantep BB”-də oynayır. Yəqin ki, bu, sizin üçün də üstünlükdü...
- Əlbəttə, heyətdə yer alan bütün futbolçularla dostluq münasibətim var. Amma Rəhmanın yeri başqadı. Onunla hər mövzuda danışa bilirəm.
- Bir qədər geri qayıdaq. “İnter”dən ayrıldıqdan sonra adınız “Xəzər Lənkəran”la hallandı. Bəs necə oldu ki, “Xəzər Lənkəran”la yox, “Qaziantep BB” klubu ilə anlaşdız?
- Açığı, bu iki klubdan başqa, “Qəbələ”dən də təklif var idi. Məsələ seçim etməyə gəldikdə, Türkiyə klubunun təklifi daha yaxşı oldu. Onlar mənim futbol oynamağım üçün hər cür şərait yaratdılar.
- Siz Türkiyə Liqasının səviyyəsinin hər keçən il bir az daha düşməsi ilə razısız?
- Səviyyə düşür? Mən deməzdim. Türkiyə birinci liqasını görməmişdim. Gedib gördüm və təəssüratlarım yüksəkdi. Hesab edirəm ki, düzgün seçim etmişəm.
- Türkiyədə çıxış edən azərbaycanlı futbolçular (Rəşad Sadıqov istisna olmaqla) milli atributlarımızdan istifadə etməyiblər. Sizin məsələ ilə bağlı nə kimi planlarınız var?
- İnşallah, hər oyuna biləyimdə Azərbaycan bayrağı ilə çıxacam. Məqsədim həm ölkəmizi təmsil etmək, həm də komandamın uğurlarında pay sahibi olmaqdı.
- Klubunuzun maddi vəziyyəti necədi?
- Bu baxımdan hər hansı bir problem yaşamırıq. Komandamız Türkiyədə transfer bazarının fəallarındandı.
