Maksim Medvedev: Tvente Zalsburqdan zəif deyil
"Qarabağ"ın müdafiəçisi Maksim Medvedevin azerisport.az saytına müsahibəsi
- Zədədən sonrakı bərpa prosesi necə gedir?
- Sağalıram. Artıq iki gündü komanda ilə birgə məşq edirəm. Amma ayağımda hələ ağrılar qalır.
- Sizin "Tvente" ilə ilk oyunda iştirakınız nə dərəcədə inandırıcıdı?
- Dəqiq bir söz deyə bilmərəm. Böyük ehtimalla, sabah dəqiqləşəcək. Hazırda həkimlərin nəzarəti altında məşq edirəm. Mümkündü ki, iştirak ərizəsində yer alacam.
- Rusiya və Bolqarıstanla oyunlara qədər hazır ola biləcəksiz?
- Fikrimcə, həmin oyunlara qədər hər şey geridə qalacaq.
- "Qarabağ"ın futbolçuları yığmadan kənarda qaldıqlarına görə özlərini necə hiss edirlər?
- Normal (gülür). Elə alındı ki, "Qarabağ"la "Neftçi"nin oyunçuları bu dəfə yığmaya dəvət olunmadı. Hər halda Avroliqa oyunları hazırda daha vacibdi.
- Özbəkistanla oyundan nə gözləyirsiz?
- İnanıram ki, yığmamız bu gün yaxşı oyun sərgiləyib, qalib gələcək. Komandamızda təcrübəli futbolçular çoxdu. Onlar görüşün taleyini həll edə bilərlər.
- "Tvente" ilə oyun barədə nə düşünürsüz?
- Əksəriyyən "Tvente"nin Avstriya "Zalsburq"undan zəif olduğunu düşünür. Amma biz elə düşünmürük. Əksinə, hollandlar daha enerjilidilər. "Tvente"də çoxlu gənc futbolçu çıxış edir. Səhv etmirəmsə, 23-dən yaşlı futbolçuları yoxdu.
- Amma bütün futbol ictimaiyyəti "Qarabağ"ın bu komandanı keçəcəyini düşünür...
- Avstriya təmsilçisi nə qədər güclü komanda olsa da, Hollandiya çempionatı daha güclüdü. Bu çempionatın hər bir iştirakçısı da eynilə güclü komandadı. "Tvente" çempionatda 4-cü yeri tutubsa, bu, komandanın zəif olduğunu deməyə əsas vermir. Şansımız olsa da, çox böyük deyil.
- Hər halda illər öncə qarşılaşdığınız "Tvente" indikindən daha güclü idi. İndi isə "Qarabağ" həmin dövrlə müqayisədə daha güclüdü...
- Hə, onda daha güclü ifaçıları vardı. İndi də oyunun gedişatını təkbaşına dəyişə biləcək futbolçuları var. Sadəcə, o dərəcədə populyar deyillər.
- Sabahkı oyunda komandanızdan nə gözləyək?
- Yaxşı, baxımlı oyun və ümid edirəm ki, bizə sərf edəcək nəticə.
- Əgər "Zalsburq"la oyunda olduğu kimi, yenə 2:1 hesablı qələbə olsa?
- Daha yaxşı oynamağa və 2:1-dən də sərfəli nəticə qazanmağa çalışacağıq. Hollandiyada bizə daha çətin olacaq.
