Emin Nuri: Mənim Türkiyə klublarından birinə keçidim mümkün idi

Futbol üzrə Azərbaycan yığmasının və İsveçin "Kalmar" klubunun müdafiəçisi Emin Nurinin azerisport.az saytına müsahibəsi

- Özbəkistanla oyundan nə gözləyirsiz?
- Hazırlıq üçün çox az vaxtımız var. Ona görə də maksimum güclə çalışırıq ki, yaxşı oyun göstərə bilək.

- Azərbaycanla qohumluq bağlarınız var?
- Xeyr, Azərbaycan ilə heç bir bağlılığım yoxdu. Mən Türkiyədənəm. Amma bu iki ölkə qardaş dövlətlərdi. Mənim üçün də bu komandanın şərəfini qorumaq xoşdu.

- Azərbaycan yığmasından təklifi necə qarşıladız?
- Çox sevindim. Şadam ki, Azərbaycanı AÇ-2016-nın seçmə mərhələsində təmsil edə biləcəm. Komandaya faydalı olmaq üçün əlimdən gələni edəcəm.

- "Kalmar"da çıxış edən "Neftçi"nin sabiq forvardı Melvin Platye özünü orada necə hiss edir?
- O, bizim komandada cəmi dörd ay oldu. İki həftə əvvəl isə bizdən ayrıldı. Çox yaxşı oyunçudu. Amma bizimlə oyunu alınmadı. Deyəsən, Hollandiyaya qayıdıb.

- Nə vaxtsa Türkiyənin böyük klublarında oynamağı arzuladığınızı demişdiz. Bu hədəfiniz dəyişməyib?
- Bəli, bunu demişdim. Bu ilin əvvəlində də belə şansım var idi, amma müqavilə imzalaya bilmədim. Yaxşı təklif olmadı.

- Yığmada sağ cinahda Mahir Şükürovla rəqabət aparmalı olacaqsız. Çətin olmayacaq?
- Əsas heyətə düşməyə çalışacam.