Qarabağın oyununa 10 min bilet satılıb: qara bazar da öz işindədi

Avropa Liqasının pley-off mərhələsi çərçivəsində keçiriləcək "Qarabağ" - "Tvente" görüşünə bilet satışı sürətlə davam edir. Son məlumatlara görə 10 000-ə yaxın bilet satılıb.

Amma bu dəfə də "qara bazar" öz işini görür. Azərisport.az xəbər verir ki, "Qarabağ" klubu məsələylə bağlı Nərimanov rayon Polis İdarəsinə müraciət etsə də, qanunsuz bilet satışının qarşısını almaq mümkün olmayıb. Polis idarəsi tərəfindən kassalara nəzarət edilsə də, bu problemin qarşısını almayıb. Müşahidələrimiz zamanı 16-17-ci sektorlarla biletlərin satışda olmadığı üzə çıxdı. Kassadan bununla bağlı məlumatsız olduqları söylənildi.

Əldə etdiyimiz məlumata görə, mərkəzi sektorlara biletlər yalnız sabah satışa buraxılacaq.

Maraqlıdı ki, kassalara yaxınlaşmaqla rahat şəkildə istədiyin qədər bilet almaq olur. Bu isə "qara bazar"da işləyənlərin istəyinə uyğundu. Oyundan əvvəl çoxlu sayda bilet alan bir qrup insan matç günü onları dəyərindən baha satırlar.

Namiq Məmmədov adlı azarkeş saytımıza problem haqda bunları dedi: "Biz hər zaman klublarımızın avrokuboklardakı oyununa dostlarla birgə gəlirik. "Zalsburq"la oyuna bileti gec aldıq. Ona görə də 2 manatlıq biletlərə 10 manat ödəməli olduq. Bu dəfə həmin problem olmaması üçün bazar günü kassaya yollandıq. 7 bilet aldım. Bilirəm ki, "qara bazar"ın qarşısını kəsmək mümkün deyil. Bütün dünyada bu var. Ona görə də biletləri vaxtında almaq vacibdi".

Tofiq Bəhramov adına stadionda olduğumuz zaman kassalarda növbə olduğunu gördük. Maraqlıdı ki, səhər saatlarında gələn orta yaşlı kişilər 10-15 bilet almaqla diqqəti cəlb edirdi. Bu əlbəttə ki, onların sonrada biletləri "qara bazar"da satışa çıxaracağına dair şübhələr yaradır. Yaxınlaşıb soruşduqda "bilet almaq olmaz məgər. Nə qədər istəyirik, alırıq" cavab verməklə kifayətləndi.

Nərimanov Rayon Polis İdarəsinin əməkdaşları bildirdi ki, avqustun 21-də "Qarabağ" - "Tvente" oyunu zamanı stadion ətrafında nəzarət daha da gücləndiriləcək. "Qara bazar"da bilet satışına imkan verilməyəcək. Biletlər yalnız kassalarda olmalıdı. Ona görə matç günü azarkeşlərə bilet təklif edənlər məsuliyyətə cəlb olunacaq.

Xatırladaq ki, "qara bazar" "Qarabağ" - "Zalsburq" görüşündə də özünü göstərmişdi. Mərkəzi sektorlara yüzlərlə bilet əvvəlcədən kassadan alınaraq oyun günü satışa çıxarılmışdı. Nəticədə oyun günü həmin biletlər dəyərindən 2-3 dəfə baha satıldı. Bu haldan narazı olan azarkeşlər də məcbur olub həmin biletləri alırdı. Çünki, "Qarabağ"ın oyununa stadiondan baxmaq istəyirdilər.