Mahir Şükürov: Rusiya bizdən qisas almağa çalışacaq

Futbol üzrə Azərbaycan yığmasının və Türkiyənin "Karşıyaka" klubunun müdafiəçisi Mahir Şükürovun azerisport.az saytına müsahibəsi

- Özbəkistanla yoxlama oyununa hazırlıq necə gedir?
- Bu, seçmə mərhələ öncəsi bizim üçün vacib oyundu. Komandamızın aparıcı futbolçuları olmadan oynayacağıq. Gənclərə üstünlük verəcəyik. Buna baxmayaraq, qələbəyə oynayacağıq. Maksimum gücümüzü qoymalıyıq ki, müsbət nəticə qazanaq.

- Türkiyədəki işləriniz necə gedir?
- Daha məsuliyyətli olmuşam. Öz üzərimdə çalışıram. Fikrimcə, bunun bəhrəsini yığmamızın oyununda görə biləcəksiz.

- "Karşıyaka"da əsas heyətə düşməklə bağlı problem olmayacaq?
- Problem olacağını düşünmürəm. Mən ora ehtiyatda oturmaq üçün yox, oynamağa getmişəm. Baş məşqçinin güvəndiyi futbolçulardanam. Çalışacam ki, əsas heyətə layiq olduğumu hər oyunda göstərə bilim.

- Klubda yığmaya dəvət olunmağınızı necə qarşıladılar?
- Buna sevindilər. Hər bir klub öz futbolçusunun yığmaya dəvət olunmasına sevinir. Baxmayaraq ki, avqustun 19-da bizim yoxlama oyunumuz var idi və həmin matçda meydana çıxmağım yaxşı olardı. Çünki hələ "Karşıyaka"ya tam uyğunlaşmamışam. Buna baxmayaraq, yığmaya gəlişimə icazə verdiklərinə görə, onlara da təşəkkürümü bildirirəm.

- Seçmə mərhələ çərçivəsində Bolqarıstanla ilk oyun öncəsi sizi Moskvada Rusiya ilə sınaq matçı da gözləyir...
- Avqustun 31-də Türkiyə çempionatı start götürəcək. Ondan sonra iki həftə fasilə olmalıdı. Fikrimcə, yığmaya gəlişimdə problem olmayacaq. Rusiya ilə oyun maraqlı olacaq. Bu iki komanda arasındakı oyunlar həmişə maraqlı keçir. Fikrimcə, ruslar son ev oyunumuzda qeydə alınan 1:1 hesablı heç-heçənin revanşını almağa çalışacaq. Yaxşı sınaqçı-rəqibdi. Bolqarıstanla oyuna daha yaxşı hazırlaşmağımıza xeyri olacaq.