Cavadov: Özbəkistan və Rusiyaya uduzsaq da, Bolqarıstana qalib gəlməliyik
Türkiyənin "Qaziantep BB" klubunun hücumçusu Vaqif Cavadovun azerisport.az saytına müsahibəsi
- Özbəkistanla oyuna hazırlığa start vermisiz. Nə deyə bilərsiz?
- Yığmaya dəvət almaq həmişə xoşdu. Uşaqları çoxdan idi görmürdüm. Bizim əsas hədəfimiz AÇ-2016-nın seçmə mərhələsi çərçivəsində Bolqarıstana qarşı keçirəcəyimiz ilk oyuna tam hazır olmaqdı.
- Özbəkistandan əlavə, yığmamız sentyabrın 3-də də Rusiya ilə yoxlama oyunu keçirəcək...
- Bolqarıstanla oyun daha vacibdi. Baxmayaraq ki, yığmamızın hər bir oyunu bizim üçün mühüm əhəmiyyət kəsb edir. Çünki ölkəmizi təmsil edirik. Özbəkistanla Rusiyaya uduzsaq da belə, Bolqarıstana qalib gəlməliyik. Əminəm ki, seçmə mərhələnin ilk oyununda qazanacağımız qələbə bütün ölkə əhalisini sevindirəcək.
- Amma sizin üçün Rusiya ilə oyun da vacib olmalıdı...
- Maraqlı oyun olacaq. Belə bir komanda bizimlə oynamaq istəyir, yığmamızı öz meydanında qəbul edir. Biz də çalışmalıyıq ki, onlara qarşı layiqli müqavimət göstərək.
- Türkiyəyə gedişinizdən sonra nəsə dəyişib?
- Xüsusi dəyişiklik yoxdu. Yenə də iddialıyam. Qələbələr qazanmaq, daha da artırmaq istəyirəm. Mən elə 2-3 il əvvəlki oyunçuyam.
- Türkiyədəki məşqlər xoşunuza gəlir?
- Hər bir klubun öz məşq metodları olur. Mənim üçün problem olmur. Türkiyə PTT 1-ci liqası bizim Premyer Liqamızdan geri qalmır. Düzdü, orada peşəkarlıq daha çoxdu. Amma Azərbaycan klubları da yerində saymır.
- Yoxlama oyunlarında artıq bir neçə qol vurmusuz...
- İlk oyunumda qol vura bildim. Geridə qalan beş yoxlama oyunumuzun hamısında iştirak etmişəm.
