Şehiç: Qrup mərhələsinə Tvente yox, Qarabağ adlayacaq

"Qarabağ"ın qapıçısı İbrahim Şehiçin azerisport.az saytına müsahibəsi

- "İnter"lə oyununuz qolsuz başa çatdı. Oyun haqda nə deyə bilərsiz?
- Çox çətin oyun oldu. Meydana qələbə üçün çıxmışdıq. Amma hava buna imkan vermədi. İstədiyimiz oyunu göstərə bilmədik.

- Yeganə səbəb isti havaydı?
- Hər halda bu qədər isti olmasaydı, biz istədiyimiz oyunu göstərə biləcəkdik. Hansı şəraitdə oynadığımızı nəzərə alsaq, qazanılan bir xalı da normal nəticə sayıram. Həm də "İnter" çox yaxşı rəqibdi.

- Axı hakim sizə fasilə imkanı yaradırdı...
- Elə də olmalıydı. Hakim özü də meydanda qaçanlardan biri idi və oyunçuları ən yaxşı o başa düşürdü. Belə istidə oynamaq çox çətindi. Düzdü, mən yerimdə dayanmışdım, amma komanda yoldaşlarıma daha çox çətin idi. Yaxşı ki, hələ uduzmadıq.

- "Qarabağ"ın Premyer Liqadaya startını normal saymaq olmaz...
- Razıyam. Amma bunu problemə çevirməməliyik. Qarşıda hələ çox oyunumuz olacaq. İndidən nəsə demək düzgün deyil. Hər şey yaxşı olacaq. "Qarabağ" güclü komandadı.

- "Tvente" ilə oyuna artıq az vaxt qalıb...
- Rəqibin kimliyini nəzərə alsaq, ikiqat çətin olacaq. Amma biz əlimizdən gələni edəcəyik ki, istədiyimiz nəticəni qazanaq. Allah eləsin ki, qrup mərhələsinə "Tvente" yox, biz adlayaq.