Fariz Nəcəfov: Qəbələ öz hədəfinə çatacaq gücdədi
"Qəbələ"nin vitse-prezidenti Fariz Nəcəfovun azerisport.az saytına müsahibəsi
- Premyer Liqanın ilk turunda "İnter"ə 4 cavabsız qolla uduzmağınız sizin üçün nə dərəcədə gözlənilməz oldu?
- Belə oynamağımızı, bu hesabla uduzmağımızı təsəvvür etmirdim. Gözlənilməz nəticədi. Oyundan sonra məşqçiylə, futbolçularla söhbətləşdim. Rəhbərlik komandaya inanır. İnanıram ki, qarşıdakı oyunlarda nəticələrimiz ürəkaçan olacaq.
- Bu inam hardandı ki? Qısa vaxt ərzində nə dəyişdi?
- Heç bir dəyişiklik olmayıb. Sadəcə, bu, mövsümün ilk oyunu idi. Komandanı bir oyuna görə mühakimə etmək düzgün deyil. Bizim kifayət qədər güclü heyətimiz var. Komanda qarşıya qoyulan hədəfə çatacaq gücdədi.
- Komandanın Hollandiya toplanışında olmuşduz. "Qəbələ" həmin oyunu sərgilədi?
- Təbii ki, yox. Komandamız toplanış zamanı keçirdiyi oyunlarda daha çox qol vəziyyəti yaradırdı, baxımlı futbol sərgiləyirdi. Elə oyunlardan sonra "İnter"lə matçda gördüklərimi izah etmək çətindi.
- Baş məşqçinizin əvəzedici komandaya göndərdiyi Dodo ilə bağlı nə deyə bilərsiz?
- Dodo bizim üçün çox vacib futbolçudu. Əsas odu ki, o, səhvini başa düşdü. Səbrsizliklə braziliyalı futbolçunun əsas komandaya dönüşünü gözləyirik.
- Bunu klubun vitse-prezidenti deyir?
- Komandanı baş məşqçi idarə edir. Dorinel Muntyanu Dodonu cəzalandırmaq qərarına gəlib, geri də o qaytara bilər. Rəhbərlik baş məşqçinin istənilən qərarına hörmətlə yanaşır. Gözləyəcəyik. Ola bilər ki, elə ikinci turdan sonra komandaya qaytarılsın.
- Avropa Liqasında "Şiroki Briyeq"ə uduzduğunuz ev oyunu zamanı azarkeşlər sizi istefaya səsləyirdi. Bunu necə qarşıladız?
- Əgər azarkeşlər nəticələrdən narazıdısa, subyektiv olaraq kimisə günahkar bilirlərsə, buna normal yanaşmaq lazımdı. Hər kəsin öz fikri var. Əgər mənim günahkar olduğumu düşünürlərsə, bu, onların haqqıdı.
- Adətən klub prezidenti və baş məşqçi istefaya çağırılar. Sizin istefanızı istəmələri nə ilə bağlıdı?
- Prezidenti klubu idarə etmir, təşkilati məsələlərlə məhz mən məşğul oluram. Əgər 5-6 azarkeş məni istefaya səsləyirsə, buna normal qarşılayıram. Amma biz əlimizdən gələni edirik ki, komanda daha da yaxşı çıxış etsin.
