"Qarabağın püşkdə bəxti heç vaxt gətirmir"
"Qəbələ"nin müdafiəçisi Vladimir Levin "Qarabağ"la "Neftçi"nin Avropa Liqasının pley-off mərhələsi çərçivəsində müvafiq olaraq Hollandiya "Tvente"si və Serbiya "Partizan"ı ilə oyunlardakı şanslarını dəyərləndirib. Azerisport.az saytına açıqlamasında o, bunları söyləyib:
"Qarabağ" bir neçə il öncə "Tvente" ilə oynamışdı. O vaxt səfərdəki məğlubiyyətə görə (0:0, 1:3) mərhələ adlaya bilməmişdi. Amma indi Ağdam klubunun səviyyəsi daha yüksəkdi. "Qarabağ" hazırda ən güclü komandalardan biridi. Qrup mərhələsinə vəsiqə qazanmaq üçün gözəl şans əldə ediblər. "Tvente"ni keçə bilərlər. Amma "Qarabağ"ın püşkdə bəxti heç vaxt gətirmir. Artıq neçə dəfə qrup mərhələsinin bir addımlığında dayanmalı olublar. Amma nə etmək olar? Hər dəfə güclü rəqiblərlə düşürlər. "Neftçi"nin də mərhələ keçmək şansları əllinin əlliyədi. Hər ikisinə uğurlar arzulayıram. İki klubumuzun qrup mərhələsində oynaması çox yaxşı olardı".
