Vladimir Levin: Dorinel Muntyanu bildirdi ki, İnter adi futbol oynayır

"Qəbələ"nin müdafiəçisi Vladimir Levinin azerisport.az saytına müsahibəsi

- Mövsümün açılış turunda "İnter"ə böyük hesabla uduzmağınıza nə səbəb oldu?
- Biz həqiqətən çox pis oynadıq. Amma belə böyük hesabla uduzmağımız da gözlənilməz oldu. Çox təəssüf ki, çempionata məğlubiyyətlə başladıq. Yəqin ki, bu yenilgi özümüzə gəlməyimizə kömək edər.

- Yəqin ki, 4 cavabsız qolla uduzacağınızı gözləmirdiz...
- Heç məğlubiyyəti gözləmirdik. Meydana qələbə üçün çıxmışdıq. Amma alınmadı. Rəqib də sıradan komanda deyildi. "İnter" çox yaxşı komandadı.

- Düşünmürsüz ki, bu məğlubiyyət komandaya növbəti oyunlarda da mənfi təsir etsin?
- Ümid edirəm ki, növbəti oyunumuzda qələbə qazanacağıq.

- Komanda yoldaşlarınız uğursuzluğu heyətdəki futbolçuların yeni olması ilə əlaqələndirir. Siz də elə düşünürsüz?
- Düzdü, heyətimiz yeni formalaşıb. Uyğunlaşma ilə bağlı problemlər var. Amma əlbəttə, bu, məğlubiyyətimizə haqq qazandıra bilməz.

- Siz meydana ikinci hissədə çıxdız. Bu, daha çox qol buraxmamaq üçün atılmış addım idi?
- Bu, baş məşqçinin istəyi idi. Təbii ki, hesabın daha böyük olmasına imkan verməmək istəyirdik.

- "İnter"in oyununda sizin gedişinzdən sonra çox dəyişiklik var?
- "İnter"in oyun üslubu dəyişib. Baş məşqçiləri ildən-ilə oyun üslubunu daha da yaxşılaşdırır.

- Oyun ərəfəsində baş məşqçi Dorinel Muntyanu "İnter"i analiz etmişdi?
- Şübhəsiz. Amma mən ona "İnter" haqda heç nə söyləməmişdim. Baş məşqçi özü rəqibin oyunlarını izləmişdi. Biz də onun dediyi kimi oynamağa çalışdıq. O, bildirmişdi ki, "İnter" adi futbol oynayır.

- İlk oyun "Qəbələ"nin ən problemli mövqeyinin müdafiə olduğunu göstərdi...
- Bu məğlubiyyətdə bütün komandanın günahı var. Kimisə ayırmaq düzgün deyil.

- Razısız ki, çempionata tam hazır deyilsiz?
- Təəssüf ki, elədi. Hollandiya toplanışı zamanı yaxşı yoxlama oyunları keçirdik. Gücümüz yetərincədi. Sadəcə, hər şeyin yoluna düşməsi üçün zamana ehtiyacımız var.