Rexviaşvili: Neftçi bizdən açıq-aşkar güclü idi

Gürcüstanın "Çixura" klubunun müdafiəçisi Georgi Rexviaşvilinin azerisport.az saytına müsahibəsi

- Avroliqanın üçüncü təsnifat mərhələsində "Neftçi" səddini niyə keçə bilmədiz?
- Rəqibimiz güclü idi. Biz hər iki oyunda 100 faiz gücümüzü meydanda qoyduq. Amma gördüyünüz kimi, bu, yetərli olmadı.

- Komandanız buraxılan qollardan sonra daha fəal oynamağa başladı...
- Təəssüf ki, elədi. Biz oynamağa başlayanda, "Neftçi" artıq hesabda yaxşı fərq yaratmışdı.

- Siz komandanızın aparıcı müdafiəçisiz. Het-trik edən Ernest Nforu saxlamaq belə çətindi?
- Əgər onun hər zərbəsindən sonra top qapıya gedirsə, necə saxlaya bilərdik ki? Bu, onun günüdü.

- Bu, klublar arasındakı real fərqi göstərir?
- Bəli, rəqibimiz bizim dişimizə görə deyildi. "Neftçi" açıq-aşkar bizdən güclü idi. Xüsusilə maliyyə baxımından. Səviyyəli legionerləri var. Bakı klubunun büdcəsi bizdən qat-qat böyükdü. Bu iki klub arasında ciddi fərqlər var.

- Bəs onda niyə ilk oyundan əvvəl "Neftçi"ni Bakıda 2 cavabsız qolla məğlub edəcəyinizi demişdiz?
- Mən sadəcə, komandama inandığımı göstərməyə çalışmışdım. Türkiyə "Bursaspor"unu mübarizədən kənarlaşdırmaqla özümüzü yaxşı tərəfdən göstərə bildik. Türkiyə klubuna gücümüz çatsa da, Azərbaycan təmsilçisinə çatmadı.

- Avroliqadakı çıxışınızla Azərbaycan klublarının diqqət mərkəzinə düşməyiniz mümkündü?
- Nə vaxt təklif alsam, onda bu sualınıza cavab verərəm (gülür).

- Sizinlə "Bursaspor" da maraqlanıb. Əgər hər iki ölkədən təklif alsaz, hansını qəbul edərsiz?
- Təkliflərin necə olmasına baxır. Amma gizlətmirəm ki, Türkiyədə oynamaq daha prestijli və perspektivlidi.