Ruslan Əmircanov: Belə məğlub olacağımızı gözləmirdik

"Qəbələ"nin müdafiəçisi Ruslan Əmircanovun azerisport.az saytına müsahibəsi

- Komandanız yeni mövsümün starında "İnter"ə niyə böyük hesabla (0:4) məğlub oldu?
- Oyunumuz alınmadı. Daha dəqiqi, pis oynadıq. Belə hesabla uduzmaq çox pisdi. Halbuki, oyuna çox yaxşı hazırlaşmışdıq.

- "Qəbələ"nin hətta buraxılan qollardan birinə belə cavab verə bilməməsini nə ilə izah edərdiz?
- Etiraf edim ki, belə aqibətlə üzəşəcəyimizi gözləmirdik. Baxmayaraq ki, hamımız "İnter"in necə güclü olduğundan xəbərdar idik. Oyun başlayan kimi gözlənilməz qol buraxdıq. Sonra tələsik hücuma atılıb hesabı bərabərləşdirməyə çalışdıq. Amma biz buna çalışdığımız vaxt rəqib növbəti qolları vurdu.

- "Qəbələ"nin müdafiə xətti çox zəif oynadı. Maçta hazır deyildiz?
- Oyuna hazır idik. Məğlubiyyətdən qaçmaq üçün də çox çalışdıq. Sadəcə, "İnter" əks-hücumlarda yaxşı oynadı. Əfsuslar olsun ki, müdafiədə uşaq səhvləri buraxdıq. Nəticə də göz qabağındadı.

- Komanda bu məğlubiyyətdən sonra özünə gələ biləcək?
- Qarşıda 35 oyun var. Bir məğlubiyyətlə hər şeyə son qoyulmur.

- Razısız ki, "İnter" bu gün təkcə hücumda yox, bütün mövqelərdə sizdən üstün idi?
- Bu, sadəcə, bizim günümüz deyildi. Futbolda belə şeylər də olur. İnanın ki, bundan sonra "İnter"lə 50 oyun da keçirsək, belə səhvlər etmərik. Oyunumuzu analiz edəcəyik və çalışacağıq ki, bundan sonrakı matçlarda daha yaxşı çıxış edək.

- Bu fiaskonu necə unudacaqsız?
- Bu mövsüm "İnter"lə daha üç oyunumuz olacaq. Onları Qəbələ məğlub edib, hər şeyi unudacağıq.