Simurqda dörd müqavilə
"Simurq" yeni mövsüm üçün heyətini komplektləşdirməyə davam edir. Azerisport.az xəbər verir ki, bir neçə yeni futbolçu ilə sıralarını genişləndirən Zaqatala klubu heyətindəki oyunçulardan da bəzisi ilə yeni müqavilələr imzalayıb.
Belə ki, ötən gün Stepan Polyakla münasibətlər yenilənib. Təcrübəli yarımmüdafiəçi ilə 1+1 sistemli müqavilə imzalanıb. Xorvatiyalı futbolçu artıq üçüncü mövsümdü ki, Zaqatala təmsilçisinin heyətində çıxış edəcək. 31 yaşlı futbolçu indiyə qədər "sarı-qaralar"ın heyətində 64 oyunda meydana çıxıb və 11 dəfə rəqib qapısına yol tapıb.
Polyakla yanaşı, daha bir legioner futbolçunun müqaviləsinin müddəti artırılıb. Ötən mövsüm "Simurq"un ən məhsuldar futbolçusu olmuş Draqan Çeran daha iki il Zaqatala təmsilçisinin şərəfini qoruyacaq. Ötən mövsümün əvvəlində heyətə qatılan serbiyalı futbolçu çıxdığı 31 qarşılaşmada 13 dəfə rəqib qapıçılarını məyus etməyi bacarıb.
Ötən mövsüm əvəzedici heyətlərin ölkə birinciliyinin bombardirlərindən biri olmuş Oruc Balaşlı və kapitan Kənan Müslümovla da yeni anlaşma əldə olunub. Hər iki futbolçu daha üç il "Simurq"un şərəfini qoruyacaq. Zaqatala futbol məktəbinin yetirmələri artıq karyeralarını əsas komandada davam etdirəcəklər. Sloveniya və Avstriyada keçirilən təlim-məşq toplanışlarında da özlərini yaxşı tərəfdən göstərən gənclər məşqçilər korpusunun inamını qazanmağı bacarıblar. Oruc Balaşlı bu mövsüm 25, Kənan Müslümov isə 33 nömrəli forma ilə mübarizə aparacaq. (klub saytı)
