Rauf Əliyev: Tvente həmin komanda deyil, Partizanı da keçmək olar
"Xəzər Lənkəran"ın hücumçusu Rauf Əliyev Topaz Premyer Liqasının 1-ci turu çərçivəsində qarşılaşdıqları AZAL ilə səfər oyunundan (1:1) sonra azerisport.az saytının suallarını cavablandırıb.
- Hesabı siz açsaz da, qələbə qazana bilmədiz. Buna nə mane oldu?
- Oyuna yaxşı başlamışdıq. Birinci qolu da biz vurduq. Əfsuslar olsun ki, bu üstünlüyümüzü qoruya bilmədik. Rəqib azlıqda qalana kimi daha yaxşı oynayırdıq. Onların oyunçusu qırmızı vərəqə alandan sonra bizdə arxayınlıq yarandı. İkinci qolu vurmaq üçün çoxlu şansımız olsa da, boşa verdik. Rəqibin isə qapımıza yeganə zərbəsi qolla nəticələndi. Məncə, bu, təsadüfi nəticədi.
- Sərgilədiyiniz oyundan razı qaldız?
- Fikrimcə, "Xəzər Lənkəran" indi daha yaxşı oynayır. Amma meydanda futbolçular arasında anlaşma səviyyəsinin daha yaxşı olmasına ehtiyac var. Çünki komanda yeni yığılıb.
- Oyundan sonra Oğuz Çətin sizə nə dedi?
- O, iki xal itkisindən çox narazı idi. Səhvlərimizi açıqladı. Dedi ki, növbəti oyunda daha yaxşı oynamağımıza ehtiyac var.
- Qol vurduqdan sonra hərbi salam verməyiniz çox diqqət çəkdi...
- Mən bunu ona görə etdim ki, azərbaycanlıyam. Şəhidlərimizin cəbhədə həlak olmasına görə özümü pis hiss edirdim. Onlara görə fəxr hiss edirəm. Ona görə də qoldan sonra belə hərbi salam verməyi özümə borc bildim.
- Yeni komandanla ilk rəsmi oyunda qol vurmaq necədi?
- Hədəfimiz çempionluqdu. Amma bunu sözdə yox, nəticələrlə demək lazımdı. Qarşıda uzun bir marafon var. Azarkeşlərimizi sevindirmək lazımdı ki, komandamıza inansınlar.
- Növbəti turda "Sumqayıt"la qarşılaşacaqsız...
- Yaxşı hazırlaşmaq lazımdı. Əsas odu ki, yaxşı forma toplayaq.
- Keçmiş klubunuz "Bakı"nın mövsümə başlaya bilməməsi sizi üzmür?
- "Bakı"dan danışmaq istəmirəm. Məni yalnız XL narahat edir.
- Qarşıda yığmamızı Özbəkistanla yoxlama oyunu gözləyir. "Neftçi" və "Qarabağ"ın futbolçuları olmadan oynamaq çətin olmayacaq?
- Onlarsız çətin olacaq. Amma evdə oynayacağıq. Bu da bizim üstünlüyümüzdü. Heyətdən asılı olmayaraq, qələbə qazanmağa çalışacağıq.
- "Qarabağ"la "Neftçi"nin Avropa Liqasının pley-off mərhələsində qələbə qazanmaq şanslarını necə qiymətləndirirsiz?
- Mənim fikrimcə, "Tvente" də, "Partizan" da normal rəqiblərdi. "Tvente" beş il öncəki güclü komanda deyil. "Neftçi" də "Partizan"ı keçə bilər.
