Rasmus Benqtsson: Tvente Qarabağdan daha güclü rəqiblərlə də düşə bilərdi

Hollandiyanın "Tvente" klubunun müdafiəçisi Rasmus Benqtsson Avropa Liqasının pley-off mərhələsi çərçivəsində qarşılaşacaqları "Qarabağ"la oyun öncəsi azerisport.az saytının suallarını cavablandırıb.

- Püşkatmanın nəticəsini necə dəyərləndirirsiz?
- Biz daha güclü rəqiblərlə də düşə bilərdik. Amma hesab edirəm ki, püşkün nəticəsi komandamız üçün qənaətbəxşdi.

- "Qarabağ"ı zəif rəqib hesab edirsiz?
- Mən bütün rəqiblərə hörmətlə yanaşıram. "Qarabağ"ın da zəif və ya güclü rəqib olduğunu deyə bilmərəm.

- Bu komanda haqda nə bilirsiz?
- Onlar haqda heç nə eşitməmişəm. Amma komandanın Avroliqanın pley-off mərhələsində oynaması çox şeydən xəbər verir.

- Sizcə, favorit "Tvente"di?
- Bəli, elədi. Amma favoritlərin həmişə qələbə qazanmaması başqa məsələdi. Ümid edirəm ki, bizim oyunlarımızda istisna olmayacaq. Biz qrup mərhələsinə vəsiqə qazanmaq istəyirik.

- "Qarabağ"ın beş il öncə Avroliqada "Tvente" ilə oynadığını bilirsiz?
- Xeyr. O oyunlar necə qurtarmışdı?

- Hollandiyada 1:3, Bakıda 0:0.
- Heç o heyətdən hazırda hansı futbolçunun qaldığını bilmirəm. Amma əminəm ki, bizə yeni rəqibimizi yaxşı öyrənmək vacibdi. Yəqin ki, son beş ildə rəqib komanda da çox dəyişib. "Qarabağ" Azərbaycanın ən güclü klublarındandı?

- Bəli, son çempiondu...
- (qısa sükutdan sonra) Onlarla ciddi məşğul olmaq lazımdı.