Soriano: Qarabağla oyunda bizə dəstək lazımdı

"Zalsburq"un kapitanı Conatan Soriano UEFA Çempionlar Liqasının üçüncü təsnifat mərhələsi çərçivəsində "Qarabağ"a qarşı keçirəcəkləri cavab matçı öncəsi fikirlərini açıqlayıb. Azerisport.az saytına müsahibəsində o, öncə bunları dilə gətirib:

"Bu oyunu intizarla gözləyirəm. Bu görüş bizim üçün asan olmayacaq. "Qarabağ" ilk oyunda yaxşı komanda olduğunu göstərdi. Kompakt futbol sərgiləyirlər, yaxşı müdafiə olunurlar. Bilirik ki, "Qarabağ" bizə boşluqlar verməməyə çalışacaq".

"Qarabağ"da kimlərin oynayıb-oynamayacağına fikir vermirik. Daha çox öz oyunumuzu düşünürük. Əminəm ki, həmişəki kimi oynasaq, qələbə qazana biləcəyik. "Qarabağ"a gəlincə, onlara hörmətlə yanaşırıq".

"Şanslar 50-nin 50-yədi. Doğma publika önündə, öz meydanımızda oynayacağıq. Bizə dəstək lazımdı. Bakıdakı oyun da göstərdi ki, futbolda azarkeş amili çox böyük rol oynayır".

"Zalsburq"u tərk etmək haqda düşünməmişəm. Klubla müqaviləm var. Məni Zalsburqda hər şey qane edir. "Zalsburq"un adi komanda olduğunu düşünmürəm. Əla komandamız var. Bu klubda niyə oynadığımı sabah (bu gün - red.) görəcəksiz".