Ansi Aqolli: Zalsburqa ÇL-in pley-off mərhələsinə adlamaq üçün gəlmişik
Azərbaycan çempionu "Qarabağ"ın müdafiəçisi Ansi Aqolli Çempionlar Liqasının üçüncü təsnifat mərhələsi çərçivəsində Avstriya "Zalsburq"una qarşı keçirəcəkləri cavab matçı öncəsi azerisport.az saytının suallarını cavablandırıb:
- Avstriyaya səfər necə keçdi?
- Hər şey normaldı. Sakit gəldik çatdıq. Xüsusi yorğunluq yoxdu.
- "Qarabağ" səfər oyununda hansı nəticəyə ümid edir?
- Bura yaxşı nəticə qazanmaq üçün gəlmişik. Hər şey plan üzrə olmalıdı. Amma təbii ki, uğurlu nəticəyə nail olmaq çox çətin olacaq. Çünki rəqibimiz çox güclü komandadı.
- Səfərdə heç-heçəyə nail olmağınız realdı?
- Biz bura növbəti mərhələyə adlamaq üçün gəlmişik. Ancaq "Zalsburq"un da gücünə yaxşı bələdik.
- "Qarabağ" ilk oyunun ikinci hissəsini inamsız keçirdi. Bu, nə ilə bağlı idi?
- Biz artıq Bakıdakı oyunu unutmuşuq. İlk matçda qalib gəldik. Oyunun gedişində problemlərlə üzləşsək də, qələbə qazana bildik. Rəşad Sadıqovun meydana çıxmasından sonra müdafiədə daha inamlı oynamağa başladıq. Bədavi Hüseynov da yaxşı çıxış etdi.
- Sabah "Qarabağ"dan uğurlu nəticə gözləməyə dəyər?
- Bizim hədəfimiz də budu. Bunun üçün sonadək döyüşməliyik.
