"Hətta Gürcüstanın baş naziri də şokdadı"

"Karvan"ın sabiq futbolçusu Qoça Trapaidze Azərbaycanın "Neftçi" və Gürcüstanın "Çixura" klubları arasında keçirilmiş Avropa Liqasının üçüncü təsnifat mərhələsi çərçivəsindəki ilk oyunda qonaq azarkeşlərin açdığı xəritə ilə bağlı yaranan qalmaqala münasibət bildirib. Azerisport.az saytına açıqlamasında o, bunları söyləyib:

"Siz inanmazsız, amma bütün Gürcüstan şokdadı. Hətta bizim baş nazir də. O, göstəriş verib ki, bu hadisənin səbəbkarları cəzalansınlar. Hamı deyir ki, bunu gürcülər edə bilməzdi. Burada əmindilər ki, bu işdə erməni əli var".

Trapaidzenin sözlərinə görə, hazırda həmin şəxslər axtarışdadı: "Gürcüstan polisi indi həmin erməniləri axtarır. Yaxşı ki, hər şey normal qurtarıb. Hər şey daha pis ola bilərdi. Gürcüstanda azərbaycanlılar həmişə dost xalq hesab olunub. Mən heç onların Bakıya necə getdiyini anlaya bilmirəm. Amma bu, bizim azarkeşlərin məsuliyyətini azaltmır. Yəqin ki, bütün bu söhbətlərdən sonra cavab oyununda Tiflisdəki stadion tam dolmayacaq".

Ölkəmizdə çıxış etmiş futbolçu sözügedən qalmaqallı xəritənin bütün Gürcüstanda böyük ajiotaja səbəb olduğunu açıqlayıb: "Baş nazir İrakli Qaribaşvili yerli telekanallardan birində verdiyi açıqlamada bildirdi ki, günahkarlar tapılmalıdı. O, bildirdi ki, Azərbaycan və azərbaycanlılar qardaşımız olaraq qalacaqlar. Belə olub, belədi və belə də olacaq. Heç kim bizim münasibətlərimizə kölgə sala bilməz".