Namiq Yusifov: Bizə Teli və Reynaldosuz çox çətin olacaq
"Qarabağ"ın yarımmüdafiəçisi Namiq Yusifovun azerisport.az saytına müsahibəsi
- "Zalsburq"la səfər oyunundan nə gözləyirsiz?
- Bizə çətin olacaq. 2:1 hesablı qələbə ən sürüşkən nəticədi. Amma hər halda bu, qolsuz heç-heçədən daha yaxşıdı.
- "Qarabağ" müsbət nəticəyə nail ola bilər?
- Əlbəttə. Əgər Bakıdakı oyunun ilk hissəsindəki kimi oynasaq və ələ düşən qol şanslarından yararlansaq, buna nail ola bilərik. Bunu Avstriyada da etməyə çalışacağıq.
- Yəni Zalsburqda müdafiədə oturmayacaqsız?
- Öz qapımız qarşısında oturmaq olmaz. "Zalsburq" bundan yararlana bilər.
- Reynaldo və Admir Telisiz nə dərəcədə ağır olacaq?
- Bizə onlarsız çətin olacaq. Fikrimcə, baş məşqçi vəziyyətdən çıxış yolu tapa biləcək.
- Onlara verilən qırmızı vərəqələri necə dəyərləndirərdiz?
- Teli ikinci sarı vərəqəni alanda mən kənarda məşq edirdim və epizodu görmədim. Reynaldonun epizodunda isə meydanda idim. Məncə, oyunçumuz dirsəyi ilə rəqib oyunçuya toxundu. Adətən belə epizodlarda avropalı hakimlər çox sərt qərarlar verirlər.
- Hər şeyə rəğmən, qələbə qazana bildiz...
- Bilirdik ki, çətin olacaq. Amma bu dərəcə çətinliklə üzləşəcəyimizi gözləmirdik. Yaxşı ki, hər şey bizim üçün yaxşı bitdi. Hardasa, bəxtimiz də gətirdi. Oyunu doqquz nəfərlə bitirmək çox çətindi.
