Qara Qarayev: Zalsburqda 90 dəqiqə müdafiə olunmayacağıq

"Qarabağ"ın yarımmüdafiəçisi Qara Qarayevin azerisport.az saytına müsahibəsi

- "Zalsburq" üzərindəki qələbədən (2:1) sonra komandada atmosfer necədi?
- Yaxşı. Cavab oyununa hazırlaşırıq. Başa düşürük ki, Zalsburqda bizə daha çətin olacaq. Rəqib aqressiv oynamağa və hücum futbolu sərgiləməyə çalışacaq.

- İlk oyunu çox xatırlayacaqsız?
- Cavab oyununa qədər yəqin ki, elə olacaq. Hamı bilirdi ki, biz necə komandaya qarşı oynayacağıq. Amma çətin olsa da, müsbət nəticə qazana bildik. Baxmayaraq ki, 2:1 hesablı qələbənin bizə heç nə vermədiyini anlayırıq.

- İlk hissədən sonra əvəzlənməyinizə nə səbəb oldu?
- Bu barədə heç düşünməmişəm. Baş məşqçi məni əvəzləmək istədi, mən də əməl etdim. Mümkündü ki, sarı vərəqəmin olmasından ehtiyatlandı. Əsas odu ki, əvəzetmələr oyunumuzu korlamadı.

- Ola bilər ki, Qurban Qurbanov sizdən gözlədiyini ala bilmədiyi üçün əvəzlədi?
- Bu barədə heç nə deyə bilmərəm. "Qarabağ"ın bu oyundakı hər əvəzetməsi oyunumuza müsbət təsir göstərdi.

- Reynaldo və Admir Telisiz cavab matçında işiniz çətin olacaq...
- Elədi. Amma mümkünsüz heç nə yoxdu. İtki varsa, onları əvəzləyəcək futbolçularımız, zədədən dönənlərimiz də var. Rəşad Sadıqovla Maksim Medvedev artıq komandaya kömək edə bilirlər.

- Rəqibin hücum futbolunun qarşılığında "Qarabağ" necə futbol oynayacaq?
- Bizim də öz oyun üslubumuz var. Düşünmürəm ki, 90 dəqiqə ərzində müdafiə olunaq. Bizim də güclü tərəflərimiz var və ondan yararlanmağa çalışacağıq. Bizə sadəcə, azarkeşlərimizin yoxluğu hiss oluna bilər. İlk oyunda onlar bizi möhtəşəm dəstəklədilər. İnanılmaz atmosfer vardı. Hələ belə dəstəklənməyimizi xatırlamıram. Belə dəstək olsa, həmişə yaxşı nəticələr qazana bilərik.