Böyükağa Hacıyev: Cavab matçında ilk qolu vuran mərhələni adlayan tərəf olacaq

"Neftçi"nin baş məşqçisi Böyükağa Hacıyev Avropa Liqasının üçüncü təsnifat mərhələsi çərçivəsində Çürcüstan "Çixura"sına qarşı keçirdikləri ilk oyunundan sonra fikirlərini açıqlayıb. Azerisport.az xəbər verir ki, o, qolsuz bitən qarşılaşmanı belə şərh edib:

"Mən həmişə açıq futbol oynayan komandalara hörmət etmişəm. "Çixura" qapalı futbol oynadı. Amma əminəm ki, Tiflisdə daha çox qol vurmağa çalışacaqlar. Gürcüstan futboluna, xalqına hörmət edirik".

"Bertuççi hansı mövqedə oynayırdı? Bu gün üç müdafiəçi ilə oynadıq. Onun yaxşı sürəti, zərbələri var. Oyunun gedişi zamanı dəyişiklik etdik. Mən ondan daha dəqiq zərbələr gözlədiyim üçün əvəzləmədim. Əlbəttə, hesab bizi qane etmir. Tiflisdəki oyunda ilk qolu vuran qalib gələcək".

Hacıyev Vobayla Nforun çıxışını da dəyərləndirib: "Vobay Sloveniyadakı oyunda özünü yaxşı tərəfdən göstərmişdi. Nforun oyunundan isə narazıyam - bunu gizlətmirəm. Hücumçunun işi qol vurmaqdı. Əgər o, bunu bacarmırsa, deməli, nəsə qaydasında deyil. Ola bilər ki, biz yaxın günlərdə sizin də tanıdığınız məşhur bir futbolçu ilə müqavilə imzalayaq. Kaue universal futbolçudu, o da bu gün çox çalışdı".

"Biz hücumçu məsələsini həll etməyə çalışırıq. Platye tezliklə qayıtmalıdı. Mən Nforu seçəndə, o, tamamilə fərqli futbolçu idi. İndi isə probleminin olduğu görünür".

"Şenol Günəşlə məsləhətləşmək? Xeyr. Mən özüm onların oyunlarına baxıb müəyyən nəticələr çıxarmışdım. Müxtəlif hücumlar qurmağa çalışsaq da, alınmadı".

"Bu gün iki insaydla 3-6-1 sistemi ilə oynadıq. İnsaydlar hücuma fəal kömək etməliydilər. Vobay sürətli oynamaq lazım gələndə top saxlayırdı. Flavinyo geriyə çox gəlirdi. Yəqin ki, cavab oyununda fərqli oynamalıyıq".

"Çixura"nın oyunçuları heç-heçəyə sevinirdilər? Əlbəttə, bu gün bizim büdrəməyimizə sevinənlər var. Amma hər şeyə bir həftə sonra aydınlıq gələcək. "Koper" "Çixura"dan güclü idi".