Əliyev: Çixura Neftçidən zəifdi

Futbol üzrə Azərbaycan yığmasının sabiq hücumçusu Samir Əliyev "Neftçi"nin Avropa Liqasında Gürcüstan "Çixura"sını keçmək şansları barədə danışıb. Azerisport.az saytına açıqlamasında o, bunları söyləyib:

"Neftçi" Gürcüstan klubuna qalib gələcək. Bunun üçün rəqibə çox qol vurmaq lazımdı. "Çixura"nı yaxşı tanımasam da, bu komandanın Azərbaycan klubundan zəif olduğunu düşünürəm. Avrokubok oyunları da bunu göstərir. "Neftçi" ən azı avrokuboklardakı böyük təcrübəsinə görə bu komandanı keçə bilər. Elə futbolçuların səviyyəsinə görə də fərqlər var. Təbii ki, Türkiyə "Bursaspor"unu keçən komanda o dərəcədə zəif ola bilməz. Amma "Neftçi"nin heyətində APOEL, "Rubin", "İnter" kimi Avropa klublarına qarşı oynamış futbolçular var. Komandamızın heyətini qoruması böyük üstünlükdü".

Əliyev "Qarabağ"ın Avstriya "Zalsburq"u üzərindəki qələbəsindən (2:1) də danışıb: "Qarabağ"a həmişə güclü rəqiblər düşür. Amma Ağdam klubu bu dəfə də göstərdi ki, güclü komandalara qarşı oynamağı, qalib gəlməyi bacarır. Səfərdə Qarabağ"ı çətin oyun gözləyir, avstriyalılar çox sürətli oynayırlar. Amma "Qarabağ"ın uğur qazanacağına inanmaq lazımdı".