Reynaldo: Cavab matçını buraxacağım üçün təəssüflənirəm
Azərbaycan çempionu "Qarabağ"ın futbolçusu Reynaldo UEFA Çempionlar Liqasının üçüncü təsnifat mərhələsi çərçivəsində Avsriya "Zalsburq"una qarşı keçirdikləri ilk oyundan (2:1) sonra azerisport.az saytının suallarını cavablandırıb:
- Oyun haqda nə deyə bilərsiz?
- Bizim üçün çətin oyun alındı. Daha çox müdafiədən oynayıb, əks-hücumlara bel bağlayırdıq. İki qol vurmağa nail olduq. Artıq cavab oyununu gözləməliyik.
- Hücumda tək qalmışdız. Çətin deyildi?
- Kimə asan idi ki? Şübhəsiz ki, belə bir komandaya qarşı hücumda tək oynamaq asan deyil. Amma bu gün "Qarabağ"ın hər bir oyunçusu çox yaxşı mübarizə apardı. Baş məşqçinin bütün tapşırıqlarını yerinə yetirdik və qələbə qazandıq.
- Birinci hissədəki qırmızı vərəqə azmış kimi, siz də oyunun sonlarında meydandan kənarlaşdırıldınız...
- Həmin epizodun təkrarına baxmaq lazımdı. Çox təəssüf edirəm ki, cavab oyununda komandamıza kömək edə bilməyəcəm.
- Qırmızı vərəqə alsaz da, azarkeşlər sizi alqışlarla yola saldılar...
- Bunu görmək çox xoş idi. Alqışları bütün komanda haqq edirdi. Bizi sonadək dəstəkləyən azarkeşlərə təşəkkürümü bildirirəm.
- "Qarabağ" pley-offa Reynaldosuz çıxa biləcək?
- Növbəti mərhələyə vəsiqə qazanmağımız lazımdı. Bunun mənimlə və ya mənsiz olması böyük önəm kəsb etmir. Yaxşı hazırlaşmalıyıq. Bunun üçün bir həftəmiz var.
- Amma sizinlə yanaşı Admir Teli də oynamayacaq. Bunlar ciddi itkilərdi...
- "Qarabağ" kifayət qədər yaxşı komandadı və bizi əvəzləyəcək başqa futbolçuları da var.
