Qurbanov: Çixuranı həm evdə, həm də səfərdə məğlub etməyə çalışacağıq

"Neftçi"nin hücumçusu Ruslan Qurbanovun azerisport.az saytına müsahibəsi

- Avropa Liqasının üçüncü təsnifat mərhələsində Gürcüstan "Çixura"sı ilə mübarizə aparacaqsız. İlk oyundan nə gözləyirsiz?
- Onları pis tanımırıq. Bu yay "Çixura"ya qarşı iki yoxlama oyunu keçirmişdik. Rəqibə hörmətlə yanaşırıq. Başa düşürük ki, yalnız bu komanda ilə oyunlara ciddi yanaşacağımız halda uğur qazana bilərik.

- Sloveniya "Koper"inə ilk oyundakı məğlubiyyətdən dərs çıxarmısız?
- Şübhəsiz. Amma həmin oyunda rəqibimizin bəxtinin gətirdiyini də qeyd etmək lazımdı. Bütün ikinci hissəni hücumda keçirdik. Yaxşı ki, ikinci oyun bizim daha güclü olduğumuzu göstərməyə imkan verdi.

- Bəs bu komandanı səfərdə necə yendiniz?
- Sadəcə, ələ düşən qol vəziyyətlərindən yaxşı yararlandıq, müdafiədə daha diqqətli oynadıq. Təsadüfi deyil ki, cavab qarşılaşmasından sonra bizim ilk oyundan bu komandaya necə uduzduğumuzu sual verir.

- Hesab 1:0 olarkən bu qolun davamının gələcəyinə əmin idiz?
- Bəli, belə bir əminlik var idi. Çünki oyuna nəzarət bizim əlimizdə idi. Şadam ki, komandama bu yolda kömək edə bildim.

- "Çixura" ilə oyunda meydana əsas heyətdə çıxmağınızı gözləmək olar?
- Əsas heyətə düşmək üçün çox çalışıram. Amma kimin qol vurmasının mənim üçün fərqi yoxdu. Əsas olan komandamın qələbəsidi.

- "Neftçi" "Çixura"nı keçəcək gücdədi?
- Əlbəttə. Hər iki oyunda qələbə azanmağa çalışacağıq. Əlbəttə, "Qarabağ"a da azarkeşlik edəcəyik. Allah eləsin ki, onlar da növbəti mərhələyə vəsiqə qazansınlar.