David Odikadze: Bizim bəxtimiz gətirdi ki, Bursasporu keçdik
Gürcüstanın "Çixura" klubunun kapitanı, vaxtilə "İnter"də çıxış etmiş David Odikadzenin azerisport.az saytına müsahibəsi
- Avroliqada "Neftçi"yə qarşı keçirəcəyiniz oyunlardan nə gözləyirsiz?
- Bizi iki çətin oyun gözləyir. "Neftçi" bizim üçün güclü rəqibdi. Onların heyətində kifayət qədər yüksək səviyyəli futbolçular çıxış edir. Buna baxmayaraq, şansların bərabər olduğunu düşünürəm. Çalışacağıq ki, növbəti mərhələyə adlayaq.
- Bəs kimin şansı daha çoxdu?
- Əlbəttə, "Neftçi" bizdən bir addım da olsa, öndədi.
- "Çixura" bu yay "Neftçi"yə qarşı iki yoxlama oyununda üz-üzə gəlib, Avroliqada da Türkiyə "Bursaspor"unu mübarizədən kənarlaşdırıb. Sizcə, hansı daha güclüdü?
- Bu iki klub arasında müqayisə aparsaq, komandanızın geri qaldığını demək olar. "Bursaspor" çox çətin komandadı. Bizim bəxtimiz gətirdi ki, onları keçdik.
- Bakılıların heyətində kimi xüsusi qeyd edə bilərsiz?
- "Neftçi"nin demək olar ki, bütün futbolçularını tanıyıram, onların nəyə qadir olduğunu bilirəm. Amma xüsusi olaraq Flavinyonun oyununu qeyd edə bilərəm. O, komandasının ən yaxşısıdı.
- İlk matçda necə oynamağı planlaşdırırsız?
- Yəqin ki, "Bursaspor"a qarşı oynadığımız ilk oyundakı kimi hərəkət edərik. Rəqibin hücumda çox təhlükəli olduğunu unutmamalıyıq.
- "Neftçi"nin "Koper"lə oyunlarına baxmısız?
- Yox. Amma oyuna kimi onu bizə göstərəcəklər. Eşitmişəm ki, "Neftçi" Sloveniyada möhtəşəm çıxış edib.
- "Bursaspor"la oyunda gürcü azarkeşlər Türkiyə bayrağını yandırıblar, oyundan sonra isə fanatlar arasında davam düşüb. Bütün bunlar "Neftçi" ilə qarşıdakı oyuna da təsirini göstərə bilər?
- Bayrağın yandırılmasını görməmişəm. İnsident də olmayıb. Bizim bir gənc futbolçumuz penalti zərbəsini yerinə yetirdikdən sonra bursalı azarkeşlərə tərəf qaçdı və ondan sonra qarşıdurma yarandı. Hesab edirəm ki, futbolçumuz düzgün hərəkət etmədi. Ümid edirəm ki, bakılılarla oyunlarda belə hal təkrarlanmayacaq.
