XL yeni transferlərini təqdim etdi
“Xəzər Lənkəran”ın rəsmi saytı komandaya cəlb olunan yeni futbolçuları ictimaiyyətə təqdim edib. Azerisport.az onlar barəsində məlumatları diqqətinizə çatdırır.
Fernando Qabriel Vuqado Ribeyro
Təvəllüd: 11 may 1988
Ölkə: Braziliya
Ölkəsinin “Moqi Mirim”, “Fiqeyrense”, “Braqantino” komandalarında çıxış edib, son iki mövsümü isə “Parana” klubunun heyətində keçirib. Hücumameyilli yarımmüdafiəçi kimi mərkəz və cinahda oynayır.
“Xəzər Lənkəran”la futbolçu arasından bir il müddətinə müqavilə imzalanıb.
Qalin Stefanov İvanov
Təvəllüd: 15 aprel 1988
Ölkə: Bolqarıstan
“Levski Sofia” klubunun yetirməsi olan İvanov yeniyetməlik dövründən oyunu ilə özünə diqqət cəlb edib. 2008-ci ildən son mövsümə qədər “Slavia Sofia”nın formasını geyinmiş cinah yarımmüdafiəçisi son iki mövsümdə komandasının əsas oyunçularından olmaqla 50-dən çox oyundan meydanda olub və 16 qol vurub.
Futbolçu klubla bir il müddətinə sözləşməyə imza atıb.
Alfred Sanko
Təvəllüd: 22 oktyabr 1988
Ölkə: Syerra Leone
Peşəkar karyerasına Norveçin “Ullen” komandasında başlayan Alfred 20 yaşında bu ölkənin aparıcı komandalarından olan “Stromsqodset”in heyətinə keçib. Bu klubda 4 il çıxış etdikdən sonra Türkiyənin “Şanlıurfaspor” klubu ilə anlaşıb və növbəti iki mövsüm ərzində türk klubunun əsas oyunçularından biri olub. Dayaq yarımmüdafiəçisi olan Sanko Syerra Leone milli komandasının üzvüdür.
Alfred Sanko “Xəzər Lənkəran” arasında iki illik müqavilə imzalanıb.
Rauf Əliyev
Təvəllüd: 12 fevral 1989
Karyerasına “Qarabağ” klubunda başlamış Rauf Əliyev son mövsümü “Bakı” klubunun heyətində keçirib. 2010-cu ildə milli komandanın şərəfini qoruyur, hal-hazırda yığmanın əsas hucumçusudur.
Rauf Əliyevlə klub arasında iki il müddətinə müqavilə imzalanıb.
Əfran İsmayılov
Təvəllüd: 8 oktyabr 1988
Raufla bir yerdə “Qarabağ”da peşəkar keryeraya başlamış Əfran da ötən mövsümü paytaxtın Bakı klubunda keçirib.
Azərbaycan millisinin yarımmüdafiəçisi ilə “Xəzər Lənkəran” arasında iki illik müqavilə bağlanıb.
Aleksandr Şemonayev
Təvəllüd: 1 aprel 1985
Ötən mövsüm AZAL-ın heyətində çıxış etmiş sol cinah müdafiəçisi daha əvvəl “Simurq” və “Abşeron” komandaların formasını geyinib.
Futbolçu ilə bir il müddətinə müqavilə bağlanıb.
(klub saytı)
