AZAL Bolunu sülhlə tərk edir
Yeni mövsümə hazırlıqlarını Türkiyədə davam etdirən AZAL növbəti yoxlama oyununu keçirib. Azerisport.az xəbər verir ki, komanda Boluda məskunlaşdığı “Koru Otel”inin meydançasında Gürcüstan I divizionunun liderlərindən olan “Kolxeti 1913” ilə üz-üzə gəlib.
Baş məşqçi Tərlan Əhmədov ötən oyunla müqayisədə heyəti demək olar, büsbütün dəyişsə də, görüş tamamilə AZAL-ın üstünlüyü şəraitində keçib. Amma bu üstünlüyü tabloda əks etdirmək mümkün olmayıb. Daha doğrusu, "təyyarəçilər" görüşün sonlarında – dəqiq desək, 89-cu dəqiqədə Təmkin Xəlilzadə ilə rəqib qapısına yol tapıb. Amma top qapı xəttini yarım metr keçsə də, hakimlərin anlaşmazlığı qolun qeydə alınmaması ilə nəticələnib. Maraqlıdır ki, görüşdən sonra xanım yan hakim qolu verdiyini, əsas hakim isə onu başa düşmədiyini bildiririb...
Baş məşqçi Tərlan Əhmədov bu görüşdə aşağıdakı futbolçulara şans verib: Ruslan Məcidov (Stanislav Namaşko, 39/Taleh Əsədov, 85), Novruz Məmmədov, Laşa Kasradze (Adil Nağıyev, 46), Tural Nərimanov (Oskar Klyava, 59), Xuanfran, Orxan Lalayev (Asif Mirili, 69), Kərim Diniyev, Rəşad Abdullayev (Eduardo Konseysao Masiel, 78), Viktor İbekoyi (Tomi Kostadinov, 78), Elmin Çobanov (Təmkin Xəlilzadə, 57), Freddi Mombonqo (Con Enrike Kordoba, 65).
Beləliklə, AZAL Türkiyədəki yoxlama oyunlarında ikinci dəfə meydandan “sülh”lə ayrılıb. Komanda bundan öncə qardaş ölkədəki ilk matçında İran U-21 ilə heç-heçə (2:2) oynamışdı. “Təyyarəçilər” eyni zamanda “Mersin İdman Yurdu” və “Antalyaspor”a qalib gəlib (hər iki halda 2:1), “Balıkesirspor”a yenilib (1:2).
Onu da qeyd edək ki, bu gün AZAL səhər tezdən məskunlaşdığı oteli, günorta saatlarında isə Türkiyəni tərk edəcək və axşam vətənə qayıdacaq. Bakıda isə 2 günlük istirahətdən sonra futbolçular ayın 31-də bir araya gələcək.
