İlqar Qurbanov: Zalsburq nə qədər güclü olsa da, hədəfimiz dəyişməz qalır
"Qarabağ"ın müdafiəçisi İlqar Qurbanovun azerisport.az saytına müsahibəsi
- Malta "Valletta"sına qarşı Çempionlar Liqasının ikinci təsnifat mərhələsindəki cavab oyununda inamlı qələbə qazandınız. Oyunla bağlı nə deyə bilərsiz?
- İlk növbədə azarkeşlərə yaxşı dəstəyə görə təşəkkürümü bildirmək istəyirəm. Oyuna gəlincə, bizi çətin oyun gözlədiyinə şübhəmiz yox idi. Elə də oldu. Xüsusilə ilk hissə çox çətin keçdi.
- Azarkeşlər oyundan razı qaldı. Bəs özünüz?
- Yaxşı oyun sərgilədik və böyük hesabla qalib gəldik. Amma əsas mərhələ adlamaq idi. Qarşıda Avstriya "Zalsburq"u ilə çətin oyunlar var. "Valletta" ilə oyunları unudub, bu qarşılaşmalara köklənməyimiz lazımdı. Çünki Avstriya çempionu ilə oyunlarımız daha çətin keçəcək.
- "Qarabağ" qələbəni Ağdamın işğal günündən bir gün öncə qazandı. Bu, futbolçular üçün hansısa önəm kəsb edirdi?
- Belə bir tarixdə xalqımızı qələbə ilə sevindirə bildiksə, deməli, meydana elə-belə çıxmamışdıq. Allah eləsin ki, Qarabağı da qaytaraq.
- "Valletta" ilə oyunlara əsasən demək olar ki, komanda daha ciddi sınaqlara hazırdı?
- Bəzi çatışmazlıqlarımız var. Komanda hələ tam hazır deyil. "Zalsburq"la ilk oyuna qədər bu çatışmazlıqları azaltmalıyıq. Növbəti rəqibimiz bizim hətta ən kiçik səhvlərimizi də bağışlamayacaq.
- "Zalsburq" haqda nə deyə bilərsiz?
- "Zalsburq"un "Valletta"dan daha güclü olması heç kimə sirr deyil. Onların nə dərəcədə güclü olduğunu bilirik. Amma bu, bizim qarşımıza qoyulan hədəfləri dəyişmir.
- Bu dəfə ilk oyun Bakıda olacaq. Bu, komandanızın işini çətinə salmır?
- Fikrimcə, bu, bizim üçün problem yaratmamalıdı. Öz meydanımızdakı ilk oyunda müsbət nəticə qazanmalıyıq ki, səfərdə bir qədər sakit yollanaq.
- "Valletta" ilə cavab oyununuzu "Zalsburq"un baş məşqçisi stadiondan izləyirdi. Rəqibdən gizlətdiyiniz nələrsə oldu?
- Düşünmürəm ki, biz nəyisə gizlətməyə çalışdıq. Bizim öz oyun üslubumuz var və "Valletta" ilə matçda da onu sərgilədik. Amma istənilən halda "Zalsburq"la oyunda tam fərqli futbol olacaq.
