Tahir Süleymanov: Çixura da Koper kimi bizə rəqib ola bilməz

"Neftçi"nin sabiq vitse-prezidenti Tahir Süleymanovun azerisport.az saytına müsahibəsi

- "Neftçi" ilk oyunda uduzduğu Sloveniya "Koper"inə səfərdə qalib gələrək mərhələ adladı. Sloveniyaya getmədiyinizə görə təəssüflənmədiz?
- Əsas qələbə qazanmaq idi, uşaqlar da bunu bacardılar. Hələ ilk oyundan sonra demişdim ki, "Koper" bizə rəqib ola bilməz, cavab matçında bacardığımızın 70 faizini göstərsək, bu komandanı keçə bilərik. "Neftçi" öz səviyyəsini göstərdi. Hətta böyük hesabla qalib gələ bilərdik.

- Qarşıda Gürcüstan "Çixura"sı ilə iki oyun var...
- Bu oyunlara məsuliyyətli yanaşmaq lazımdı. Hər bir rəqibə hörmətlə yanaşıram, amma "Çixura" da "Koper" kimi bizə rəqib deyil. Pley-offa vəsiqə qazanmaq lazımdı. Türkiyə toplanışı zamanı biz bu komanda ilə iki yoxlama oyunu keçirmişdik. "Neftçi" "Çixura"nı yaxşı tanıyır. Səviyyə fərqi şübhəsizdi. "Neftçi"nin Avroliqada bu komanda ilə hətta heç-heçə etməyə də haqqı yoxdu.

- "Koper"lə cavab oyunundan sonra istefa verməkdə tələsdiyinizi düşünmədiz?
- Xeyr. Klubun imici mənim tutduğum vəzifədən daha yüksəkdədi. Komandanı ayıltmaq lazım idi. Çünki klub prezidenti Sadıq Sadıqov da demişdi ki, əgər komanda bu mərhələni keçə bilməsə, böyük dəyişikliklər olacaq. Əgər klub rəhbərliyi bu məğlubiyyətə sakit yanaşsaydı, cavab görüşündə belə oyunun şahidi olmazdıq. Mənim proqnozlarım özünü doğrultdu.

- Sloveniyadan sizə zəng edən oldu?
- Uşaqlar qələbə ilə qayıdacaqlarına söz vermişdilər. Final fitindən 10 dəqiqə sonra Saşa Stamenkoviç mənə zəng etdi və bildirdi ki, verdiyimiz sözü tutduq. Məni tutduğum vəzifə maraqlandırmır.

- Tahir Süleymanovu bundan sonra "Neftçi" ilə nə bağlayacaq?
- Mənim bu klubla problemim yoxdu. Orada çalışmasam da, klub prezidenti ilə əla münasibətim var. Mütəmadi əlaqə saxlayırıq. Süleymanovun orada çalışıb-çalışmaması önəmli deyil, önəmli olan Azərbaycan futbolunun inkişafıdı. Yeri gəlmişkən, "Qarabağ"a da Çempionlar Liqasında Avstriya "Zalsburq"u ilə oyunlarda uğurlar arzulayıram. Ağdamlılar bu rəqibini də mübarizədən kənarlaşdıra bilərlər.

- Sizin yenidən "Neftçi"yə qayıtmağınız mümkündü?
- Mən futoldan getməmişəm. Lazım gələcəyi halda həmişə "Neftçi"yə öz məsləhətlərimlə kömək edəcəm. Əsas odu ki, Avropa "Neftçi"nin nəyə qadir olduğunu görsün. Biz nəinki Gürcüstan klubunu, pley-offdakı rəqibimizi də mübarizədən kənarlaşdırıb, qrup mərhələsində oynamalıyıq.