Neftçinin növbəti rəqibini yaxından tanıyaq
Azərbaycan Kubokunun qalibi "Neftçi" Avropa Liqasının üçüncü təsnifat mərhələsi çərçivəsində Gürcüstan "Çixura"sı ilə qarşılaşacaq. Azerisport.az sizi "ağ-qaralar"ın növbəti rəqibi ilə tanış edir.
Adını şəhərin yanından keçən bir çayın adından alan Saçxere şəhərinin təmsilçisi ardıcıl olaraq iki mövsümü Gürcüstan çempionatında 4-cü pillədə başa vurub. Bakılıların rəqibi son iki mövsümdə Gürcüstan Kubokunun finalına vəsiqə qazansa da, Tiflis "Dinamo"suna məğlub olublar. "Çixura" finalda qızıl medalları qazanmasa da, Avropa Liqasına vəsiqəni təmin edib.
1938-ci ildən yaradılan "Çixura" Gürcüstanın əsas liqasına 2006/07 mövsümündə vəsiqə qazanıb. Ancaq debütü uğursuz alınan klub növbəti 4 il birinci divizionda çıxış etməyə məhkum olum. 2011/12 mövsümündə yenidən elitaya vəsiqə qazanan gürcü klubu ortabab komanda statusunda çempionatda çıxış edir.
Gürcü klubu ev oyunlarını 2 min azarkeş tutumu olan "Central" stadionudan keçirir. Ancaq qərb qonşularımız Avroliqa matçlarını paytaxt Tiflisdə yerləşən və 27 223 azarkeş tutumu olan "Mixail Mesxi" stadionunda keçirir. Klubun ümumi büdcəsi 4 milyon avrodan artıq deyil.
Gürcüstan təmsilçisinin avrokuboklardakı çıxışı elə də parlaq deyil. Ancaq ötən və bu mövsüm Avropa Liqasında vəsiqə qazana bilən komanda bu turnirdə ümumilikdə 8 oyun keçirib və 2 qələbə, 4 bərabərlik, 2 məğlubiyyəti olub. Rəqib ötən mövsüm Samson Fruidzenin başılığı ilə ilk təsnifat mərhələsində "Vaduts"u mübarizədən kənarlaşdırsa da, növbəti mərhələdə İsveçrənin "Tyun" komandasına məğlub olaraq, Avropa macərasını başa vurmuşdu. Ötən mövsümdə klub tamamilə yerli futbolçuların xidmətindən istifadə edib.
Bu mövsüm isə "Çixura" ilk təsnifat mərhələsində səfərdə 1:0 hesabı ilə məğlub etdiyi Makedoniyanın "Turnovo" klubunu evindən də əliboş yola salmışdı - 3:1. Növbəti qurban isə Türkiyənin "Bursaspor" klubu oldu. Hər iki oyunda hesab açılmadığından qalib penaltilərlə müəyyənləşdi ki, 4:1 hesabıyla üstün olan "Çixura" "Neftçi" ilə qarşılaşmaq hüququ qazandı.
Bu komanda "Neftçi" üçün elə də yad deyil. Belə ki, "ağ-qaralar" bu yay Türkiyədə təlim-məşq toplanışında olarkən "Çixura" ilə iki dəfə qarşılaşıb. Yoxlama matçlarının birində gürcülər 3:2 hesabı ilə qalib gəlib. Növbəti oyunda isə komandalar meydandan sülhlə ayrılıb - 1:1.
Gürcüstan klubunun heyətində vaxtilə "İnter"də çıxış etmiş bir futbolçu - David Odikadze top qovur.
