Klas İnqesson: İnterə İsveçin ən güclülərindən biri olduğumuzu göstərməliyik
İsveçin "Elfsborq" klubunun baş məşqçisi Klas İnqesson Avropa Liqasının ikinci təsnifat mərhələsi çərçivəsində Bakı "İnter"inə qarşı keçirəcəkləri cavab matçı öncəsi klub saytın müsahibə verib. Azerisport.az sizi sağlıq durumunda problem olduğuna görə Bakıya gələ bilməyən mütəxəssisin açıqlamaları ilə tanış edir.
- Komanda ilə Bakıya gedə bilmədiz...
- Bu səfərin mənə necə təsir edəcəyi məlum deyildi. Buna görə də qərara gəldik ki, evdə qalım.
- Kənardan komandanı idarə etmək necə mümkün olacaq?
- Məşqçilər korpusu ilə mütəmadi əlaqə saxlayıram.
- İlk oyundakı məğlubiyyətdən sonra cavab qarşılaşmasındakı şansları necə qiymətləndirərdiz?
- Çox yaxşı. Ötən oyuna baxsaz, görərsiz ki, bizim qol vurmaq üçün xeyli şansımız vardı. Sadəcə, onlardan yaxşı yararlana bilmədik. Amma rəqib öz şansını yaxşı dəyərləndirdi. Fikrimcə, cavab matçında uğur qazanmaq üçün yaxşı şansımız var. "İnter" ilk oyunda 2-3 qol vursaydı, onda vəziyyətimiz çətin olardı. Amma bir qol vurulduğuna görə, vəziyyəti xeyrimizə dəyişə bilərik.
- İlk oyunla bağlı daha hansı düşüncələriniz var?
- Borasda oyunumuz getmədi. Nəticədə, qol buraxdıq. Qoldan sonra rəqib artıq bizim səhvlərimizi gözləməyə başladı. Məğlubiyyətə görə özümüz günahkarıq. Əminlik çatışmırdı. Məsələn, uzaqdan zərbələr demək olar ki, yox idi.
- Məgər məşqlərdə kimin daha yaxşı formada olduğunu görmürdüz?
- Məşqlərdə hər şey yaxşı idi. Yorğun deyildik, ötürmələr yaxşı idi. Məncə, məğlubiyyətin əsas səbəbi əsəbilik oldu. Sürətli oynamadıq. Bizim əsas rəqibimiz elə özümüzük. Tələsməməliyik, sakit, inamlı, gözəl oynamalıyıq. "Elfsborq"un İsveçin ən yaxşı klublarından biri olduğunu isbatlamalıyıq.
- Cavab oyununda uğurlu nəticə üçün nə lazımdı?
- Əsas müdafiədə diqqətli oynamalıyıq. Uşaqlar arxa xəttdən arxayın oynamalıdılar. Ola bilər ki, bizim bu oyunda hücuma atılacağımızı düşünsünlər. Amma biz həmişə müdafiədən oynamışıq, sürətli hücumlar qurmağa çalışmışıq. Təzyiqə hazır olmalıyıq. Komandam bu görüşün nəticəsini öz xeyrinə dəyişməyə qadirdi.
